Kronikë zgjedhore Haradinaj: Me kryetarët e Aleancës komunat bëhen më të jetueshme
Kreu i AAK-së, Ramush Haradinaj, përmes një videomesazhi në Facebook ka bërë thirrje që të votohen kandidatët e kësaj partie që garojnë në pesë komuna. Ai ka thënë se AAK-ja i ka kandidatët më të mirë. Derisa Smajl Latifi ka prezantuar edhe një projekt tjetër për Rahovecin
Kreu i Aleancës për Ardhmërinë e Kosovës këtë të mërkurë ka vizituar Komunën e Klinës dhe kandidatin për kryetar Zenun Elezaj. Haradinaj, i cili ka shpërndarë disa foto në rrjetin social Facebook, ka thënë se Klina është e sigurt për 14 nëntor.
“Klina e sigurt për 14 nëntor. Të gjithë për kryetarin Zenun Elezaj – 121”, ka shkruar Haradinaj.
Haradinaj gjatë ditës përmes një videomesazhi, duke u bërë thirrje të gjithë qytetarëve të dalin dhe të votojnë, ka thënë se AAK-ja i ka kandidatët më të mirë.
“Ju lutem votoni për ata që do ta bëjnë komunën e juaj më të jetueshme për ju. Ju lus të mos i harroni pesë njerëz të jashtëzakonshëm të Aleancës për Ardhmërinë e Kosovës (AAK), Ardian Gjinin, Zenun Elezin, Smajl Latifin, Agron Kuçin dhe Bekë Berishën. Jo pse janë të Aleancës, po se janë njerëz të përgjegjshëm, janë kryetar të mirë. Jam i bindur se duke i votuar këta kryetarë ju po e bëni komunën tuaj më të jetueshme, se këta dëshmuan se dinë të punojnë me njeriun, dinë të punojnë me ju. Suksesi këtë të diele për Gjakovën, Klinën, Rahovecin, Junikun dhe Istogun është në numrin 121. Na priftë e mbara!”, ka thënë ai.
Smajl Latifi, kandidat për kryetar të Rahovecit nga kjo parti, ka prezantuar projektin për Kompleksin Sportiv në Zonën Turistike të kësaj komune.
“Tradita e investimit në sektorin e kulturës, rinisë dhe sportit do të vazhdojë edhe në mandatin e ri përmes përkrahjes në ndërtimin e mjediseve sportive dhe rekreative”, ka thënë ai.
Nga Aleanca për Ardhmërinë e Kosovës në balotazh kanë shkuar pesë kandidatë, të cilët garojnë në komunat e Gjakovës, Klinës, Rahovecit, Junikut dhe Istogut.
