Lokalet 2021

Kronika Zgjedhore / Kurti: Në Gjakovë fitojmë me të parën, në disa komuna me balotazh

 

Lëvizja Vetëvendosje synon që Komunën e Gjakovës ta fitojë pa balotazh. Lideri i kësaj partie, Albin Kurti, gjatë vizitës në këtë qytet tha se në disa komuna nuk do të mund të fitojnë pa balotazh, porse Gjakova nuk do të jetë një prej tyre

Kreu i Lëvizjes Vetëvendosje, Albin Kurti, njëherësh kryeministër i Kosovës, është shprehur i bindur në fitoren e kandidates së LVV-së në Gjakovë, Mimoza Kusari. Në një tubim në kundërshtim me masat anti-COVID, ku shkoi për t’i dhënë mbështetje Kusarit, Kurti tha se ka disa komuna ku partia e tij do të mbesë në balotazh, porse Gjakova nuk është e nuk duhet të jetë një ndër to.

“Do të ketë komuna në Kosovë ku fitojmë në balotazh në raund të dytë, por Gjakova nuk ka nevojë të jetë njëra prej tyre, në Gjakovë duhet të fitojmë më 17 tetor. Pra, pas zgjedhjeve, kur të numërohen fletëvotimet Mimoza do të fitojë”, ka thënë Kurti.