Mbështetje për ndërmarrësit në Podujevë ka premtuar Besnik Tahiri, kandidati i AAK-së për këtë komunë. E Ardian Gjini, kandidat për Gjakovën, është zotuar për ndërtim të kanalizimit e ndriçimit. Premtime për hapësira të gjelbra janë dhënë ndërkaq nga kandidatët në Rahovec e Klinë.
Me premtime AAK-ja e ka vazhduar edhe ditën e 15-të të fushatës për zgjedhjet lokale të 17 tetorit.
Kandidati i AAK-së për Podujevën, Besnik Tahiri, teksa i është referuar programit të tij, është zotuar se do t’u dalë krah të gjithë ndërmarrësve në këtë komunë.
“Me programin zhvillimor ‘Podujeva 2025’, secili njeri, ndërmarrës, person i cili është duke gjeneruar punësimin, do të jetë afër meje. Unë do të jem afër tij, do të jem krahu i tij. Gjendjen aktuale, ku aplikohen politika të paqarta e financime të copëzuara do ta ndryshojmë, duke promovuar dhe mbështetur me masa stimuluese bizneset që eksportojnë prodhimet vendëse”, ka deklaruar Tahiri.
Rregullim të kanalizimit e ndriçimit ka premtuar ndërkaq kandidati për Gjakovën, Ardian Gjini.
E Bashkim Ramosaj, kandidat për Deçanin, fushatën e ka vazhduar me video.
Ndërsa kandidati për Prishtinën, Daut Haradinaj, në takim me banorët e rrugës “Muharrem Fejza”, me ç’rast nuk u respektuan rregullat anti-COVID, u ka premtuar atyre se brenda gjashtë muajsh do të formojë komisionin për verifikimin e objekteve dhe pranimin teknik.
E ndërtim të parqeve nëpër çdo fshat ka premtuar kandidati për Klinën, Zenun Elezaj. Ai ka shkruar se krijimi i hapësirave të gjelbra, rekreative e sportive është një nga prioritet e tyre.
Hapësira të gjelbra ka premtuar edhe Smajl Latifi, kandidat për Rahovecin.
Ai ka thënë se do të punojë për eliminimin e deponive ilegale të mbeturinave dhe do t’i zëvendësojë ato me hapësira të gjelbra.
