Eshtrat janë pjesa më rezistente dhe njëkohësisht më delikate e trupit. Thuhet se janë më të forta se çeliku, por gjithsesi njerëzit përjetojnë çdo ditë probleme me to.
Ndër më të shpeshtat janë thyerja, dhimbja apo gërryerja nga sëmundje si osteoporoza apo artriti. Rekomandimet më të shpeshta nga mjekët për këto probleme, përveç kujdesit dhe stilit të shëndetshëm të jetesës është edhe diagnostikimi në kohë. Kjo pasi të kuptosh në kohë zanafillën e problemit ndihmon edhe në zgjidhjen e shpejtë të tij.
Ndiqni më poshtë të listuara hap pas hapi se si mund të kuptoni shenjat e heshtura që trupi po ju jep.
Ju thyhen thonjtë
Thonjtë janë një pjesë delikate e trupit, ndaj s’është çudi që edhe të thyhen shumë shpejt, por nëse vini re se po ju thyhen më shumë se zakonisht atëherë ka një problem. Përtej një morie arsyesh se përse thonjtë thyhen, renditen edhe mungesa e kolagjenit apo kalciumit. Dy elementë thelbësorë për të rritur dhe zhvilluar eshtra të forta gjatë gjithë jetës.
Kolagjeni ndihmon në lidhjen e mirë të skeletit me muskulin ndërsa kalciumi ndihmon për eshtra të forta. Të dyja këto proteina mund t’i merrni lehtësisht nga ushqimet e përditshme. Më të pasurat me kolagjen janë qershitë, boronicat, lakrat apo qitro. Ndërsa kalciumin përveçse tek produktet e bulmetit, e gjeni edhe tek perimet jeshile si spinaqi, brokoli apo sardelet.
Aktiviteti fizik
Aktivitetet fizike të përditshme dhe ato sportive janë kusht për një trup të shëndetshëm. Nëse nuk keni një jetë aktive qoftë duke përfshirë edhe ecje të shkurtra në natyrë, me shumë mundësi do të zhvilloni sëmundje të kockave.
Jeta sedentare, pa aktivtitete fizike kërcënon shëndetin e të gjithë organizmit dhe veçanërisht eshtrave tuaja. Gjatë kalimit të viteve do të filloni të ndjeni lodhje më të shpeshta dhe dhimbje të përsëritura të eshtrave nëse nuk ushtroheni sadopak.
Problemet me dhëmbët
Nëse keni në mënyrë të vazhdueshme probleme të shëndetit oral, trupi po ju paralajmëron për diçka. Veçanërisht mishrat e dhëmbëve janë ato që japin alarmin e problemeve me eshtra. Nëse i keni më delikate se sa duhet dhe ju gjakosen gjatë gjithë kohës, konsultohuni menjëherë me një mjek stomatolog. Këto probleme mund të zhvillohen për vite të tëra dhe shfaqen kur eshtrat e nofullës dhe fytyrës fillojnë e dobësohen.
Jeni më të shkurtër
Nëse ndjeni se jeni më të shkurtër se disa vite më parë, do të thotë se masa juaj kockore është tkurrur. Megjithëse ky mund të jetë një proces natyral që vjen me moshën, në shumë raste të tjera do të thotë se keni probleme me eshtrat e shtyllës kurrizore. Për këtë arsye trupi ka tendencë të qëndrojë më i mbledhur gjatë përditshmërisë. E mira në këtë rast, është që të konsultoheni me një mjek specialit.
Nuk keni fuqi
Humbja e fuqisë shfaqet në periudha të ndryshme të jetës apo momente të shkurtra të ditës, gjithsesi normalisht pas disa orësh duhet të zhduket. Nëse kjo ndjesi lodhje dhe këputje e trupit zgjat për ditë e javë me radhë, shtylla juaj kurrizore mund të jetë dobësuar. Dobësimi i eshtrave në një zonë të trupit tuaj paralajmëron probleme me to në të gjithë trupin. Prandaj bëni kujdes nëse përjetoni këto simptoma.
Dhimbje muskujsh
Muskujt dhe eshtrat janë të lidhur me njëri-tjetrin dhe ndihmojnë funksionimin normal të trupit. Ndaj dhimbjet e tyre lidhen gjithnjë edhe me probleme apo dhimbje të eshtrave. Këto simptoma mund të shfaqen dhe përkeqësohen gjatë viteve. Zakonisht trupi po ju paralajmëron se keni mungesë të vitaminës D, ndaj konsumoni shumë vezë, djathë dhe omega-3 nga peshku. Në këtë mënyrë do të ndaloni krizat dhe dhimbjen e muskujve ashtu edhe të eshtrave.
Problemet hormonale
Këto probleme shfaqen kryesisht tek gratë, dhe ato në moshë. Estrogjeni që njihet si hormoni femëror nuk prodhohet më pas kalimit në menopauzë tek gratë mbi 45-50 vjeç. Këtë ndryshim e vuajnë edhe eshtrat tuaja të cilat kanë tendencën të dobësohen dhe të dhembin. Sigurohuni të kujdeseni për shëndetin e eshtrave kryesisht pas fazës së menopauzës dhe konsultohuni gjithnjë me një mjek specialist./agroweb
