Stresi nga puna është i dëmshëm për shumë më shumë se shëndeti mendor, sidomos te burrat. Përderisa studimet në vazhdimësi kanë ndërlidhur stresin e punës me mirëqenien psikike e fizike të punëtorëve, një studim i ri ka gjetur se stresi shton edhe rrezikun për sëmundje zemre te burrat.
Faktorët e stresit në punë - përfshirë ngarkesat e mëdha, afatet e shkurta e mjediset që u heqin lirinë punëtorëve - përbëjnë shtrëngim të rëndë që dëmton zemrën e punëtorëve. Përpjekja në punë ku personi nuk ndihet se po shpërblehet sa duhet, po ashtu, ka efekt negativ serioz në shëndetin e zemrës.
“Pabarazia përpjekje-shpërblim ndodh kur punëtorët përpiqen shumë, por shpërblimi që marrin në punë – si rroga, vlerësimi i punës apo siguria e saj – janë të pamjaftueshme ose të pabarabarta me përpjekjet e punëtorëve”, ka thënë autorja e studimit të ri, Mathilde Lavigne-Robichaud nga “Quebec-University Laval Research Center” në revistën e Shoqatës Amerikane të Zemrës.
Punëtorët meshkuj që përjetuan ngarkesë në punë ose pabarazi me shpërblimin, ishin 49 për qind më të prirë të kenë probleme me zemrën në krahasim me burrat pa këto ngarkesa, sipas studimit.
Burrat që përballen me këto dy telashe kishin dyfish të ngjarë që të përballen me sëmundje zemre në krahasim me burrat që s’i kanë përjetuar dy ngarkesat në të njëjtën kohë.
Efekti negativ shëndetësor nga ngarkesa në punë, i shoqëruar me pabarazinë e shpërblimit, janë thuajse të barabarta me efektet e mbipeshës në rrezikun për sëmundje të zemrës, thuhet në hulumtim.
“Duke marrë në konsideratë kohën e gjatë që njerëzit kalojnë në punë, të kuptuarit e raporteve mes ngarkesave dhe shëndetit kardiovaskular është thelbësor për shëndetin publik dhe mirëqenien e fuqisë punëtore”, ka thënë Lavigne Robichaud. “Studimi jonë nxjerr në pah nevojën për t’i adresuar në mënyrë proaktive kushtet e punës, që të krijojmë kushte më të mira pune që u përshtaten të punësuarve dhe punëdhënësve”.
Studimi është ndër të rrallët që monitoroi efektet e stresit në punë të krahasuara me rrethanat e papërshtatshme të punës, si paga e ulët apo mungesa e lirisë.
Për këtë studim, hulumtuesit monitoruan të dhënat e 6400 punëtorëve në zyra nëpër Kanada me sëmundje zemre, me moshë mesatare 45-vjeçare. Të dhënat u morën nga viti 2000 deri më 2018. U përllogarit niveli i stresit dhe pabarazia në raportin përpjekje-shpërblim, krahasuar me numrin e rasteve të sëmundjeve të zemrës.
Nuk janë kompletuar rezultatet për punonjëset.
© KOHA. Të gjitha të drejtat janë të rezervuara.
