Një studim i kohëve të fundit të neuroshkencëtarëve tek studentët ka treguar se frika për t’u gjykuar, qoftë në një mënyrë të mirë apo të keqe, lidhet me çrregullimin e ankthit social. Skanimet e trurit kanë zbuluar se disa modele në pjesën e përparme të trurit ishin të lidhura me intensitetin e kësaj frike dhe çrregullimin e ankthit social. Studimi u botua në “International Journal of Clinical and Health Psychology”.
Çrregullimi i ankthit social është gjendje e shëndetit mendor që karakterizohet nga frika intensive ose ankthi i situatave sociale. Individi ka frikë se mos gjykohet ose turpërohet. Njerëzit me këtë çrregullim kanë tendencë të përjetojnë ndjenja të tepruara dhe mund të shmangin ndërveprimet sociale ose situatat për të parandaluar ndjenjat e sikletit ose poshtërimit. Shqetësimi emocional që ndiejnë mund të shoqërohet me simptoma fizike të tilla si rrahjet e shpejta të zemrës, djersitja, dridhja dhe skuqja.
Individët që vuajnë nga çrregullimi i ankthit social përjetojnë frikën se mos vlerësohen negativisht nga të tjerët. Është simptomë kognitive thelbësore e këtij çrregullimi.
Hulumtimet më të fundit kanë treguar se individi që vuan nga ky çrregullim ka frikë jo vetëm nga vlerësimi negativ, por edhe pozitiv. Ndryshe nga frika e vlerësimit negativ, frika e vlerësimit pozitiv është simptomë që është unike për çrregullimin e ankthit social. Pavarësisht kësaj, ajo ka qenë në qendër të shumë pak studimeve krahasuar me frikën e vlerësimit negativ.
“Së fundi, një model i sjelljes së trurit u ndërtua për të integruar rezultatet e FALFF dhe modelin BFOE [frika bivalente e vlerësimit] - model teorik që propozon se frika e vlerësimit pozitiv dhe negativ janë faktorë të dallueshëm. Studimi zbuloi se sinjalet anormale të korteksit parafrontal ndikuan në simptomat e çrregullimit të ankthit social nëpërmjet frikës së vlerësimit”, kanë konkluduar autorët e studimit.
Përgatiti: Vita Abrashi-Kajtazi
