Aktorja me famë botërore, Angelina Jolie po e krijon një markë të re të veshjeve. “Atelier Jolie” quhet brendi në të cilin Jolie do të bashkëdizajnojë veshjet me drejtoreshën kreative të brendit Chloé, Gabriela Hearst.
Pas drejtimit trevjeçar të brendit Chloé, Gabriela Hearst ka bërë të ditur se do t’i ndajë rrugët me të pas lansimit të koleksionit të fundit për këtë markë në javën e modës në Paris që pritet të mbahet këtë shtator. Por para së të shkojë, Hearst do ta bëjë edhe një koleksion të fundit që do të jetë një bashkëpunim. Sipas gazetares Cassandra Dimitroff, trashëgimia e Hearstit në brendin Chloé duket të jetë një transicion drejt një kompanie më të qëndrueshme dhe kjo drejtoreshë kreative bëri që Chloe të fitojë statusin “B Corp”, që është certifikatë për kompanitë në SHBA bazuar në përfitimet e tyre në përputhje me performancën sociale dhe mjedisore.
Ndër të tjera gazetarja Dimitroff nga portali “Russh”, ka thënë se nuk e habit një bashkëpunim me Jolien pikërisht për shkak të kësaj fryme që Hearst ia ka përcjellë brendit Chloe.
Hearst dhe Jolie e kanë konfirmuar bashkëpunimin për të dizajnuar veshje për “Atelier Jolie”. Ky koleksion do të përmbajë silueta të lehta, detaje të ndërlikuara në të prekur dhe një proporcion të gjerë të materialeve që nuk e dëmtojnë natyrën. Fokusi i kreacioneve do të jenë veshjet e mbrëmjes, kryesisht fustane elegante. Duke inkorporuar materiale nga i ashtuquajturi “stok I vdekur” Jolie e Hearst po pretendojnë që ta pakësojnë ndotjen e ambientin nga mbetjet e kompanive të mëdha të modës. Linjat e themelet e koleksionit, Jolie dëshiron që të ngrihen nga artizanë e rrobaqepës që udhëhiqen kryesisht nga femrat në mënyrë që të ketë një lloj fuqizimi pozitiv drejt ndryshimit ekologjik në industri.
Hearst ka thënë se që nga momenti që e ka dëgjuar lajmin se Angelina po e hap një atelie, ka besuar fuqishëm në idenë e saj.
“Është një mënyrë e mirë për të ngritur të tjerët përmes bukurisë së krijimit të veshjeve dhe respektin e madh që Angelina e ka për mjedisin”, ka thënë Hearst. Ndër të tjera, ajo e ka konsideruar nder të madh për të dhe për brendin Chloe bashkëpunimin me Angelinan pasi që të dyja brendet për qëllim kanë përmirësimin e ambientit të specieve që banojnë në tokë.
Angelina Jolie ka thënë në uebfaqen e ateliesë se secili mund të krijojë vetë veshje dhe kështu të gjithë influencohemi nga dizajnet e të tjerëve, por beson se më së shumëti argëtohemi kur krijojmë vet për vete. Ajo gjithashtu ka thënë se moda është një art që ajo ka pasur mundësi që të luaj me të mjaft ndër vite duke krijuar dizajne e duke mësuar për forma me shumë rrobaqepës.
“Jam duke ndërtuar një vend nga njerëz kreativ që të bashkëpunojnë me njerëz të aftë, si rrobaqepës e artizan nga e gjithë bota. Një vend ku mund të krijosh lirshëm e të mund ta zbulosh vetveten”, ka thënë Angelina.
Në këtë “hapësirë krijuese” ka vend çdo individ pa dallim socio-ekonomik. “Do t’i spikasim njerëzit që kanë luajtur rol të rëndësishëm në secilin krijim”, ka thënë Jolie. Këtu Angelina po synon të bashkojë një ekip me diversitet duke i inkuadruar edhe refugjatët nga e gjithë bota.
Gjithashtu ajo ka thënë se po do që t’u ofrojë punë njerëzve që nuk janë vlerësuar për punën e tyre.
“Ne këtu në ‘Atelie Jolie’ po duam të ju ofrojmë hapësirë këtyre individëve që të shprehin artin e trashëguar ndër breza e t’i mbështesim në zhvillimin e bizneseve të tyre”, ka thënë ndër të tjera ajo.
Përgatiti: Vita Abrashi - Kajtazi
© KOHA. Të gjitha të drejtat janë të rezervuara.
