Gjërat që duhet bërë për të pasur gjumë më kualitativ
Të bëni gjumë mund të jetë e vështirë nganjëherë.
Por, një ekspert tregon se si rutina e juaj mund t’ju shkaktojë probleme kur vjen puna te kualiteti i gjumit.
Psikologu dhe eksperti i shëndetit mendor Robert Common ka thënë se është normale të luftoni herë pas here për të fjetur, por thotë se gjumi jo i mirë gjatë natës mund të ketë një sërë efektesh negative, shkruan "The Sun".
Common tregon se efektet negative sillen nga problemet me përqendrimin e deri te disponimi jo i mirë dhe simptoma të tjera fiziologjike.
Sipas psikologut problemet me gjumin janë edhe një prej simptomave të para të zhvillimit të ndonjë problemi të shëndetit mental.
Common thotë se është e rëndësishme që të shikoni rutinën e juaj, pasi mund të jenë duke bërë gjërat në mënyrë të gabuar, e kjo po ju pengon të bëni gjumë shtatë deri nëntë orë, siç rekomandohet.
Përdorimi i telefonit apo pajisjeve tjera elektronike
Robert Common, që është partner themelues dhe menaxher i qendrës për trajtim të shëndetit mendor dhe varësisë, “Beekeeper Hosue”, tregon se nëse përdorni telefonin celular para gjumit, atëherë jeni duke bërë gabim.
“Derisa është e nevojshme që absolutisht të shmangni përdorimin e telefonit në shtrat, po ashtu është ide e mirë që të ndaloni përdorimin e telefonit 30 minuta deri në një orë para se të planifikoni të flini”, ka thënë Common. “Pajisjet elektronike si celulari, laptopi apo tableti, emetojnë ato që quhen ‘drita të kaltra’. Këto drita shkaktojnë stimulim mendor që mund t’ju bëjë më vigjilentë dhe të ulë nivelet e melatoninës, duke e bërë kështu më të vështirë gjumin”.
Dremitja
Ndonëse mund të mendoni se është ide e mirë të flini sa herë që mundeni, psikologu Robert Common thotë se dremitja është gjë e gabuar, nëse planifikoni të keni një rutinë të mirë të gjumit.
Eksperti thotë se shumë prindër përpiqen t’i parandalojnë fëmijë e vegjël të dremisin shumë gjatë ditës, pasi bëhet një sfidë për ta që t’i qetësuar ata para gjumit gjatë natës dhe e njëjta vlen edhe për të rriturit.
“Nëse vërtetë keni nevojë të flini për të rifituar energjinë gjatë ditës, atëherë vendosni një alarm, kufizoni atë në 30 minuta dhe përpiquni të flini jo më vonë se herët pasdite”, thotë Robert.
Përdorimi i shtratit për gjëra tjera
Mund të ju duket tërheqëse të kënaqeni në serialin tuaj të preferuar në Netflix nga komoditeti i shtratit të gjumit, por Robert thotë se ky është vendim i keq.
“Të shikosh televizor, të punosh në laptop apo të përdorësh telefonin në shtrat është një zakon i keq, mund të ju duket tërheqëse, por është antiteza e një gjumi të mirë të natës. Ju mund të përforconi mesazhet në trurin tuaj se shtrati i juaj është vend për të fjetur, duke e përdorur shtratin vetëm për të fjetur. Pasi ky mesazh përpunohet në tru, atëherë mund t’ju ndihmojë që të flini më shpejt”, thotë Robert.
Ushtrimet
Ushtrimet mund të jenë mënyrë shumë e mirë për të qëndruar në formë të mirë fizike dhe shëndet të mirë. Studimet kanë dëshmuar se janë të mira edhe për zemër.
Robert Common thotë se duhet të synoni të ushtroni së paku 30 minuta në ditë, por thotë se koha është thelbësore.
“Mundohuni t’i bëni aktivitetet tuaja një apo dy orë para gjumit, sepse nëse stërvitni shumë afër kohës kur planifikoni të flini, atëherë e rrisni energjinë, që ju bën edhe të keni vështirësi të flini”, thotë Robert.
Të qenit i paqëndrueshëm
Psikologu Robert Common thotë se rutina e juaj e gjumit mund të jetë gjithashtu e gabuar nëse i mungon qëndrueshmëria.
“Njerëzit lulëzojnë në rutinë, kështu që respektimi i një orari dhe të pasurit një rutinë të qëndrueshme gjatë natës është thelbësore për të pasur gjumë kualitativ. Gjithashtu përforcon ritmin cirkadian, që është cikli ynë gjumë-zgjim”, thotë Robert.
Psikologu propozon që të përshtatet rutina që të funksionojë më së miri për stilin tuaj të jetës.
Kjo mund të përfshirë edhe bërjen e gjërave të tilla si të bëni dush para gjumit çdo natë apo të caktoni një kohë kur do të shkoni në shtrat dhe kur të zgjoheni, qoftë edhe në fundjava.
Ai thotë se kur është e mundur të bëni shtatë deri tetë orë gjumë gjatë natës dhe për t’ju relaksuar mund të lexoni apo dëgjoni një muzikë qetësuese në drita të zbehta.
Nëse jeni duke vazhduar të keni probleme me rutinën e gjumit edhe pas aplikimit të këtyre sugjerimeve, atëherë Robert thotë se mund të provoni edhe meditimin. Meditimi ju ndihmon të largoni mendimet negative nga koka.
Robert Common po ashtu thotë se mund të bëni edhe aktivitete tjera si ushtrime të frymëmarrjes, për ta ndihmuar veten që të flini.
