Tri doza të vaksinës “Pfizer” për COVID-19 ofrojnë mbrojtje të fortë për fëmijët më të vegjël se 5 vjeç, ka njoftuar kompania të hënën, një tjetër hap drejt vaksinës për fëmijët edhe më të vegjël që mund të nisë në fillim të verës.
“Pfizer” planifikon t’i paraqesë gjetjet te rregullatorët amerikanë këtë javë. Administrata e Ushqimit dhe Barnave tashmë po e vlerëson aplikimin nga “Moderna”, e cila po ofron vaksina me dy doza për fëmijët – dhe e ka caktuar 15 qershorin si datë tentative për këshilltarët e saj të pavarur shkencorë që i diskutojnë publikisht të dhënat nga njëra ose nga të dyja kompanitë.
Lajmi vjen pas muajsh pritjeje në ankth nga prindërit e dëshpëruar për t’i vaksinuar foshnjat e të vegjlit e tyre, sidomos pasi rastet e COVID-19 janë përsëri në rritje. 18 milionë të rinj nën 5 vjeç janë i vetmi grup në SHBA që nuk janë kualifikuar ende për vaksinim kundër COVID-19.
“Pfizer” ka pasur kohë të vështirë për ta kuptuar qasjen e saj. Kompania synon t’u japë fëmijëve dozë ekstra të ulët - vetëm një të dhjetën e sasisë që marrin të rriturit - por gjatë provës u zbulua se dy doza nuk dukeshin mjaft të forta për parashkollorët. Kështu, studiuesit shtuan edhe dozë të tretë për më shumë se 1.600 fëmijë - nga mosha 6 muaj deri në 4 vjeç - gjatë rritjes së variantit Omicron në dimër.
Në një njoftim për shtyp, “Pfizer” dhe partneri i saj “BioNTech” kanë njoftuar se doza shtesë kreu punë, duke ringjallur nivelet e antitrupave që luftojnë virusin mjaftueshëm për të përmbushur kriteret e FDA-së për përdorimin urgjent të vaksinës pa probleme sigurie.
Të dhënat paraprake sugjeruan se seria me tri doza është 80% efektive në parandalimin simptomatik të COVID-19, kanë bërë të ditur kompanitë, mirëpo paralajmëruan se llogaritja bazohet në vetëm 10 raste të diagnostikuara midis pjesëmarrësve të studimit deri në fund të prillit. Rregullat e studimit thonë se të paktën 21 raste nevojiten për ta përcaktuar zyrtarisht efektivitetin dhe “Pfizeri” ka premtuar për përditësim sapo të ketë më shumë të dhëna.
Derisa efektiviteti i vaksinës ka të ngjarë të ndryshojë disi, "e gjithë kjo është diçka shumë pozitive për prindërit që mezi presin ta kenë një vaksinë për fëmijët e tyre të vegjël në muajt e ardhshëm”, ka theksuar shkencëtari William Moss i Shkollës Publike Johns Hopkins Bloomberg, i cili nuk ishte pjesë e studimit.
Nëse FDA-ja i konfirmon të dhënat, vaksina mund të jetë “mjet i rëndësishëm për t’i ndihmuar prindërit t’i mbrojnë fëmijët e tyre”, ka shpjeguar ai. Por, gjithashtu, ka paralajmëruar se është e rëndësishme të përcillet se sa zgjat mbrojtja, veçanërisht kundër sëmundjeve serioze.
© KOHA. Të gjitha të drejtat janë të rezervuara.
