Lifestyle

Britania fillon testimin e një trajtimi të ri ndaj COVID-19

Testimi më i gjerë për një trajtim të ri, i cili shpresohet se do të ndihmojë që pacientët me COVID-19 të mos i zhvillojnë simptomat e rënda të sëmundjes, ka filluar që të ndërmerret në Mbretërinë e Bashkuar.

Pacientët e parë veçse i janë nënshtruar trajtimit në “Hull Royal Infirmary”, duke nisur nga e marta. Bëhet fjalë për trajtimin me përthithjen e një ilaçi me proteinën “Interferon beta”, të cilën e prodhon trupi kur preket prej një infeksioni viral. Shpresa është se kësisoj do të stimulohet sistemi imunitar, duke i përgatitur qelizat për t’i luftuar viruset.

Zbulimet e hershme kanë sugjeruar se trajtimi e ndërpret zhvillimin e rëndë të sëmundjes tek një pacient të diagnostikuar me COVID-19 dhe që është shtrirë në spital. Synohet që kësisoj të parandalohen rastet që kërkojnë trajtim me ventilator dhe madje deri në 80 për qind.

Ky trajtim është provuar nga Spitali i Universitetit të Southamptonit dhe po testohet nga kompania bioteknologjike me bazë në Southampton, “Synairgen”. Një seancë trajtimi me mënyrën e re mund të kushtojë rreth 2.000 funte, shumë kjo që nuk është edhe aq e kushtueshme për një trajtim spitalor. “Për t’u zbatuar duhet të përfaqësojë vlera të larta për çmimin”, ka thënë shefi ekzekutiv i “Synairgen”-it, Richard Marsden.

34-vjeçarja Alexandra Constantin ka qenë personi i parë që e ka marrë trajtimin, si pjesë e këtij testimi të ri, pasi ishte shtruar të hënën në spital. Ajo ka një vajzë të vogël në shtëpi, të cilën mezi pret që ta takojë. Duke e demonstruar trajtimin, infermierja mbante një makinë inhalimi që e kthen ilaçin në avull, të cilin Alexandra e thith thellë në mushkëritë e saj sa më shumë që të mundet.

Mst: Si funksionon trajtimi?

“Interferon beta” është pjesë e vijës së parë të mbrojtjes së trupit ndaj viruseve, duke e alarmuar atë për të pritur një sulm viral. Koronavirusi duket se e shtyp prodhimin e tij, si pjesë e strategjisë së tij për t’iu shmangur sistemin tonë imunitar.

Ilaçi i ri është formulë speciale e “interferon betas” që dërgohet drejtpërdrejt në rrugët e frymëmarrjes nëpërmjet makinës së inhalimit që e shndërron proteinën në avull. Ideja është se doza e drejtpërdrejtë e proteinës në mushkëri do ta nxisë një veprim më të fortë kundërviral, madje edhe tek pacientët që tashmë kanë sistem imunitar të dobët.

“Interferon beta” përdoret zakonisht si trajtim për disa lloje të sklerozave. Testimet e mëhershme klinike nga “Synairgen” kanë treguar se mund të stimulojë reagim imunitar dhe se pacientët me astmë dhe probleme të tjera kronike me mushkëri mund ta tolerojnë trajtimin me shumë lehtësi.

Rezultatet e një testimi klinik të fazës së dytë më të vogël të këtij trajtimi kishin qenë mjaft premtuese vitin e kaluar. Sipas këtij testimi, mundësitë që një pacient i hospitalizuar me COVID-19 të sëmuret rëndë – sa për të pasur nevojë për ventilator – kishin rënë deri në gati 80 për qind. Pacientët kishin gjasa dy apo tri herë më shumë që të shërohen deri në pikën kur aktivitetet e tyre të përditshme nuk do të pengoheshin nga sëmundja, ka deklaruar “Synairgen”.

Testimi gjithashtu ka rezultuar me ulje “shumë të veçantë” të vështirësive me frymëmarrje në mesin e pacientëve që kanë marrë këtë trajtim. Mirëpo mesatarja e kohës që pacientët e kishin kaluar në spital është ulur për një të tretën tek pacientët që e kishin marrë ilaçin e ri – nga nëntë ditë në gjashtë.

Por testimi ishte i vogël, me vetëm 100 pacientë, dhe nevojiten më shumë testime ashtu që të autorizohet për përdorim.

Mst: Rezultate premtuese

Testim i “fazës së tretë” është shumë më i madh. Aty do të përfshihen më shumë se 600 pacientë në 20 vende. Sikurse edhe në testimin e mëhershëm, gjysma e pjesëmarrësve do ta marrin ilaçin, kurse gjysma tjetër do ta marrin atë që njihet si variant i tij – një substancë joaktive. Ekipi që po e udhëheq studimin ka bërë të ditur se shpreson që gjithçka të përfundojë deri në verë.

Nëse rezultatet janë afër të qenit të mira, sikurse edhe në testimin e mëhershëm, atëherë studiuesit presin që ilaçi të autorizohet për përdorim te pacientët në Mbretërinë e Bashkuar dhe në vendet e tjera menjëherë pas saj.

“Po ta kishim një studim pozitiv, do të shpresonim që të ecnim shpejt prodhimit dhe shpërndarjes së ilaçit nëpër klinika”, ka thënë profesori Tom Wilkinson nga Universiteti i Southamptonit, që është duke e mbikëqyrur testimin. Ai ka shtuar se beson që ilaçi i ri – nëse e dëshmon efektshmërinë e tij – do të jetë përbërës i vaksinave që po shpërndahen.

Ai gjithashtu ka vënë në pah se do të merrte shumë kohë që e gjithë bota të vaksinohej. Ka nevojë që të ekzistojnë trajtime për njerëz që nuk do të mund të marrin vaksina. Ekziston gjithashtu edhe rreziku ndaj mutacioneve të virusit dhe që vaksinat të bëhen më pak efektive – që do të thotë se njerëzit do të fillojnë të sëmuren prapë.

Ky trajtim është rezultat i zbulimit të një ekipi të Universitetit të Southamptonit, që njerëzit me sëmundje të mushkërive, si astma apo sëmundje kronike pulmonare, shpeshherë kanë nivele të ulëta të “interferon betas”.

“Kemi menduar pse mos ta shtojmë nivelin e ‘interferon betas’ te pacientët, ku ata mund ta thithin proteinën”, ka thënë profesoresha Donna Davies, e cila ishte pjesë e ekipit. Ajo ka thënë se studimi tashmë ka treguar që COVID-19 mund ta shtypë reagimin e ‘interferon betas’. Por ekspertët paralajmërojnë se ilaçet zakonisht nuk i mbijetojnë premtimit të testimeve të hershme. “Kjo është emocionuese, por duhet të presim se çfarë do të na thonë rezultatet e fazës së tretë”, ka thënë Lamis Latif, mjek nga Londra, që ka punuar në kujdesin emergjent mjekësor. “Kemi pasur ilaçe të tjera në situata të ngjashme, për shembull e kemi pasur hidroksiklorokinën, por përsëri kur kanë arritur te testimet e tjera nuk kanë qenë kaq premtuese sa janë dukur në fillim. Kështu që këtë gjë duhet ta mbajmë në mend për këtë ilaç të ri”. \ AP