Rikthehet protestuesi epik i Laçit

Ai është pa asnjë dyshim protestuesi më i veçantë në Shqipëri. Po flasim për 55-vjeçarin Dilaver Nela nga Laçi.

Nuk i përket asnjë shoqate dhe asnjë subjekti politik. Të ishte ndryshe do t'i kishte mbledhur së paku 10 vetë. Dilaveri ka vetëm veten në protestë, edhe pse kauza i përket të gjithëve.

Sot, Dilaveri është shfaqur në qendër të Tiranës, pranë pedonales me një pankartë ku shkruan “Duam ujë o burri huji” (huaj) dhe rreth qafës ka lidhur një tub gome, shkruan mapo.

Dilaver Nela, u shfaq ndryshe nga të tjerët edhe në protestën e opozitës më 16 mars. Ndërsa protestuesit e PD mbanin pankarta “Rama Ik”, ai mbante pankartën “S’ka Shqipëri, ka 3 tepsi”.

Dilaveri ka thënë për mediat se është i shkolluar dhe di tre gjuhë të huaja, por s’ka gjetur punë. Ai shprehet i pakënaqur me të gjitha forcat politike në vend. Në mars do të deklaronte: “Këta janë cmendur kanë dalë nga shinat. Klasa politike ka mbaruar. Ndërkombëtarët i mbajnë se kanë mundësi t’i tërheqin zvarrë kurse neve s’na lënë asgjë, na kanë hipur në kurriz”.