Rasti i parë i një krokodili që la veten shtatzënë është identifikuar në një kopsht zoologjik në Kosta Rika, shkruan BBC.
Ajo prodhoi një fetus që ishte 99.9% gjenetikisht identik me veten e saj.
Fenomeni i të ashtuquajturës “lindja e virgjër” është gjetur te speciet e shpendëve, peshqve dhe zvarranikëve të tjerë, por asnjëherë te krokodilët.
Shkencëtarët thonë se tipari mund të jetë trashëguar nga një paraardhës evolucionar, kështu që dinosaurët gjithashtu mund të kenë qenë të aftë për vetë-riprodhim.
Kafsha u mor në mbrojtje kur ajo ishte dy vjeç dhe u mbajt larg krokodilëve të tjerë gjatë gjithë jetës së saj. Për shkak të kësaj, ekipi shkencor kontaktoi një ekip amerikan nga Virxhinia Polytechnic, i cili ishte i specializuar në lindjet e virgjëra, të njohura shkencërisht si partenogjenezë. Ata analizuan fetusin dhe zbuluan se ishte më shumë se 99.9% gjenetikisht identik me nënën e tij - duke konfirmuar se nuk kishte baba.
Duke shkruar në revistën “Biology Letters”, studiuesit thonë se lindjet e virgjëra mund të jenë më të zakonshme te krokodilët dhe kanë kaluar pa u vënë re deri më tani, sepse njerëzit nuk kanë kërkuar për raste të tyre.
Është e paqartë pse partenogjeneza ndodh në specie të ndryshme, por dukuritë po shfaqen më shpesh në literaturën shkencore, ndoshta sepse studiuesit tani po e kërkojnë atë. Një teori është se kjo ndodh në speciet e afta për partenogjenezë kur numrat zvogëlohen dhe ato janë në prag të zhdukjes.
© KOHA. Të gjitha të drejtat janë të rezervuara.
