Vazhdon greva e transportuesve Podujevë-Prishtinë

Për ndaljen e grevës së shoqatës së transportit “Llapi”, që ka hyrë në ditën e shtatë, zgjidhje nuk ka prodhuar takimi i një grupi punues, i formuar nga Komuna e Prishtinës. Gjatë takimit përfaqësues të shoqatës thanë se nuk u pranuan dy opsionet e tyre që u paraqitën për zgjidhjen e mospajtimeve

Grevën e nisur prej shtatë ditësh nuk e ndali të martën as takimi me një grup punues, të formuar nga Komuna e Prishtinës, për zgjidhjen e mospajtimeve.

Grupi, pjesë e të cilit janë përfaqësues të Shoqatës, të Komunës së Prishtinës e asaj të Podujevës dhe të Ministrisë së Infrastrukturës, do t’i vazhdojë takimet edhe të mërkurën për të gjetur një marrëveshje të pranueshme për të dyja palët.

Beqir Mustafa, kryetari i shoqatës së transportit “Llapi”, ka thënë se greva nuk është ndalur, pasi Komuna e Prishtinës nuk i ka pranuar opsionet e ofruara dhe i është përmbajtur vendimit që ua ndalon autobusëve të linjës qarkullimin brenda qytetit.

“Opsioni i parë ke qysh kemi punuar deri tash, me ardhë kah ‘Xhamia e Llapit’ e me shku deri në stacion, ata nuk pranuan. Opsioni i dytë, mos me hy te ‘Xhamia e Llapit’ por me vazhdu rrugës drejt Ministrisë së Shëndetësisë, Te rrethi, Stacioni i trenit, në Stacion të autobusëve dhe prapë me u kthye nëpër të njëjtën rrugë. Ata në fillim nuk pranuan, tash e lamë nesër, në orën 8:30, një takim”, ka thënë Mustafa.

Luftar Braha, këshilltar i kryetarit të Prishtinës, ka deklaruar se takimet e grupit punues për gjetjen e zgjidhjes do të zhvillohen deri në fund të javës.

“Tendenca është me arritë një marrëveshje me Komunën e Podujevës, marrëveshje ndërkomunale dhe licencimi i operatorëve ndërurban të jetë ndërkomunal. Me këtë e kishim ba një zgjidhje, sepse marrëveshjet ishin arritë më shpejt. Detyra që ka marrë grupi punues është me fillu sot dhe me përfundu të premten”, ka thënë Braha.

Edhe Arbëri 22 gus 2025 Pa zgjidhje takimi mes përfaqësuesve të kompanive të autobusëve dhe zyrtarëve të Prishtinës

Në shoqatën e transportit “Llapi” nuk u pajtuan me vendimin e ri të Komunës së Prishtinës, që e parasheh përfshirjen falas të biletës gjithëditore për transportin urban në biletën ndërurbane te qytetarët që udhëtojnë nga qytetet e tjera për në Prishtinë përmes Stacionit të Autobusëve.

Sipas tyre, një autobus urban nuk mund të përballojë shërbimin për rreth 50 udhëtarë të një autobusi ndërkomunal.