Tërhiqen emrat potencialë për anëtarë të Bordit në Autoritetin e Konkurrencës

Qeveria i ka tërhequr emrat e anëtarëve potencialë të Bordit të Autoritetit Kosovar të Konkurrencës.
Ferat Shala, kryesues i Komisionit për Ekonomi, ka thënë se kjo është bërë për shkak se vendimi i Qeverisë për emërimin e anëtarëve të Bordit të AKK-së ishte i paligjshëm.

“Vendimi i Qeverisë ka qenë vendim jo i mbështetur në bazën ligjore, vendim i paligjshëm dhe kërkon që ta tërheqim, edhe ashtu javën e kaluar ne thamë që mos ta fusim në rend dite”, ka theksuar Shala.

Ndërkaq deputetja e LDK-së, Valentina Bunjaku, ka bërë të ditur se është përgjegjësi e Qeverisë që ka sjellë emra pa kredibilitet.

“Unë kam votuar që të futet në rend të ditës, por përgjegjësi e Qeverisë është që të sjellë emra kredibilë që i plotësojnë kriteret kur ne mund t’i shqyrtojmë”, ka thënë ajo. Por Mimoza Kusari-Lila, shefe e Grupit parlamentar të VV-së, ka insistuar se vendimi nuk po tërhiqet për shkak të paligjshmërisë.

“Kërkesa e Qeverisë për tërheqje të emrave të Autoritetit të Konkurrencës nuk do të thotë se po bëhet për shkak të joligjshmërisë, gjithashtu edhe ju javën e kaluar nuk i keni refuzuar ata për këtë shkak”, ka theksuar Kusar-Lila, teksa ka pranuar se në dy emra të propozuar kanë hasur në persona me mungesë përvoje për të qenë pjesë e Bordit të AKK-së.

Edhe Arbëri 27 shk 2026 Mbi 10 institucione të pavarura pa borde funksionale

Që nga qershori i vitit të kaluar, Autoriteti Kosovar i Konkurrencës është pa bord. Kjo gjë ligjërisht ia pamundëson këtij institucioni që të gjobisë kompanitë, të cilat shkelin normat e tregut të përcaktuara me ligj.

Gjatë muajve të fundit, Kosova është përballur me inflacion, ndërsa në AKK kanë thënë se kanë bërë hulumtime, porse në mungesë të bordit ekzekutimi i gjobave nuk është i mundur.