Hoti: Të zhdukurit, plagë që e prek gjithë shoqërinë tonë

Dita e Personave të Zhdukur u shënua të dielën me thirrje për drejtësi dhe zbardhje të fatit të afro 1,600 të pagjeturve nga lufta e Kosovës. Kryetari i Komisionit për Personat e Zhdukur, Andin Hoti, tha se plaga e të zhdukurve nuk shërohet pa të vërtetën dhe pa drejtësinë. Homazhe për të nderuar jetën e këtyre personave të dielën bënë përfaqësues politikë e partiakë, teksa u shënua edhe 26-vjetori i masakrës së Mejës

Plaga e të pagjeturve nga lufta e fundit në Kosovë nuk mund të kthehet në diçka normale deri sa të zbardhet fati i të gjithë atyre që u morën me dhunë nga forcat serbe, ka thënë Andin Hoti, kryetar i Komisionit për Personat e Zhdukur.

Në shënimin e Ditës së Personave të Zhdukur gjatë luftës në Kosovë, të dielën, udhëheqës institucionalë e partiakë bënë homazhe tek Monumenti i Personave të Zhdukur, që ndodhet pranë Kuvendit të Kosovës.

E kryetari i Komisionit, Andin Hoti, kërkoi drejtësi për rreth 1 mijë e 600 persona që vazhdojnë të jenë të pagjetur.

“Të zhdukurit dhe plaga jonë nuk është plagë individuale, por është një plagë që e prek gjithë shoqërinë tonë. Është një plagë që nuk mund të ketë normalitet, pa u treguar e vërteta dhe pa ardhur drejtësia në vend. Të zhdukurit nuk mund të shërohen si plagë vetëm me kalimin e kohës. Kjo plagë do të shërohet vetëm kur drejtësia do të vihet në vend dhe e vërteta të tregohet në familje”, ka thënë Hoti.

Homazhe u bënë edhe në Parkun Memorial të të Pagjeturve, ku kryeministri në detyrë, Albin Kurti, mbajti një minutë heshtje për të zhdukurit, si edhe për të vrarët në masakrën e Mejës.

Këtë masakër, më të madhen të shkaktuar nga forcat serbe në luftën e fundit ku u vranë 376 shqiptarë, e kujtoi edhe presidentja Vjosa Osmani.

“Sot me zemër të rënduar, e kujtojmë Masakrën e Mejës, njërën nga plagët më të thella të Kosovës. 376 jetë të pafajshme u morën mizorisht nga regjimi gjenocidal i Serbisë, vetëm pse ishin shqiptarë. Plagët që la pas kjo tragjedi janë ende të hapura, por dhimbja dhe vendosmëria jonë, janë bashkuar për të mos lejuar që e vërteta të harrohet. Çdo person i vrarë e çdo person i zhdukur me dhunë gjatë luftës, çdo ëndërr e ndërprerë dhunshëm, është betim i yni për drejtësi. Në këtë tokë të shenjtë të dhimbjes, mbjellim shpresën për një të ardhme me më shumë drejtësi dhe më shumë dinjitet””, ka shkruar Osmani.

Edhe Arbëri 27 pri 2025 S’ka normalitet pa drejtësi dhe të vërtetën për të zhdukurit

Gjatë viteve 1998-1999 në luftën e zhvilluar në Kosovë janë vrarë mbi 13 mijë civilë.

Mijëra mbetje mortore janë gjetur përgjatë viteve nëpër varreza masive në Kosovë dhe në Serbi.

Ndërsa, afro 1 mijë e 600 persona vazhdojnë të mbesin të pagjetur, prej të cilëve shumica janë shqiptarë.