Nt: Në një intervistë për RTS-në, presidenti serb, Aleksandar Vuçiq, ka theksuar se Radojçiqi ndodhet në Serbinë qendrore dhe se nuk është i plagosur, teksa tha se ai do të merret në pyetje nga organet e drejtësisë në Serbi
Beograd, 28 shtator - Presidenti i Serbisë, Aleksandar Vuçiq, ka pranuar se nënkryetari i Listës Serbe, Milan Radojçiq, ka qenë në mesin e grupit të serbëve të armatosur që e sulmuan Policinë e Kosovës në Banjskë të Zveçanit, duke e lënë të vrarë rreshterin Afrim Bunjaku.
Në një intervistë për televizionin shtetëror serb, RTS, i pyetur nga gazetari nëse i njeh njerëzit që ishin në këtë grup dhe nëse e di se kush komandon me ta, Vuçiq u përgjigj.
“Po si nuk e njoh Milan Radojçiqin”
E në pyetjen e gazetarit Gorislav Papiq nëse Milan Radojçiqi i komandon ata, Vuçiqi ka shmangur përgjigjen konkrete.
“Unë nuk them se ai komandon, por ju më pyetët a i njihni këta njerëz. E njoh Milan Radojçiqin. Këta të tjerët nuk e di se kush janë, e as që e kam njohur ndonjërin. Tash dëgjova për këta njerëz”, ka thënë Vuçiqi.
Zyrtarë qeveritarë në Kosovë kanë konfirmuar se Radojçiqi ka udhëhequr grupin paraushtarak serb, përgjegjës për sulmin e së dielës. E mediat serbe, prej ditësh kanë raportuar se serbë të plagosur që morën pjesë në veprimet terroriste në Banjskë, po trajtohen në spitalet e Serbisë. Mes tyre e kanë identifikuar edhe Radojçiqin.
Por në RTS, Vuçiqi ka theksuar se ai ndodhet në Serbinë qendrore, se nuk është i plagosur, porse do të merret në pyetje nga organet e rendit në Serbi.
“Milan Radojçiqi nuk është i plagosur. Është kjo edhe një gënjeshtër e politikanit të tyre të preferuar, Sveçlës. S’është i plagosur, është njeri që veten e konsideron luftëtar për liri.....por ka gjëra për të cilat do të duhet që të japë përgjigje”.
Ministri i Brendshëm, Xhelal Sveçla, publikoi të martën pamje nga droni, në të cilat Radojçiqi shihet i uniformuar brenda Manastirit të Banjskës, bashkë me pjesëtarë të tjerë të grupit.
Radojçiqi ndodhet në arrati prej vitesh, pas aktakuzës nga organet e Kosovës lidhur me vrasjen e politikanit serb, Oliver Ivanoviq, ndërsa është edhe pjesë e Listës së zezë të Shteteve të Bashkuara të Amerikës dhe të Mbretërisë së Bashkuar.
© KOHA. Të gjitha të drejtat janë të rezervuara.
