Pas shtatë vjetësh proces gjyqësor, të 36 mjekët e akuzuar në rastin e njohur si “Stenta 2” janë liruar nga të gjitha pikat e aktakuzës në seancën gjyqësore të mbajtur të mërkurën në Gjykatën Themelore në Prishtinë.
Ata akuzoheshin për ryshfet dhe keqpërdorim të pozitës apo autoritetit zyrtar.
Gjyqtarja Suzana Çerkini ka thënë se aktgjykimi lirues është marrë në mungesë të provave.
“Lirohen nga akuza për pikën 3 të aktakuzës, për shkak se nuk është provuar se kanë kryer veprën penale të përshkruar si në aktakuzën e Prokurorisë Speciale të Republikës së Kosovës, të ndryshuar gjatë seancës gjatë shqyrtimi gjyqësor të datës 16 gusht 2023, me çka kishin për të kryer veprën penale ‘keqpërdorimi i pozitës apo autoritetit zyrtar”, ka deklaruar gjyqtarja Çerkini
Shpallja u përcoll me duartrokitje nga të pranishmit në sallën e gjyqit.
Gjykatësja Çerkini ka thënë se gjykata gjatë shqyrtimit gjyqësor ka administruar të gjitha provat personale dhe materiale të propozuara qoftë nga Prokuroria Speciale, nga të akuzuarit dhe mbrojtësit e tyre dhe pas analizimit të secilës veç e veç dhe në ndërlidhje me njëra-tjetrën dhe me mbrojtjen e të akuzuarve, dhe pas paraqitjes së pretendimeve përmbyllëse të palëve, ka vlerësuar se veprimet që të akuzuarit i kishin ndërmarrë gjatë periudhës në të cilën janë akuzuar nuk vërtetojnë fakte vendimtare që drejtpërdrejt ndërlidhen me elementet e figurës së kualifikimit ligjor të veprave penale, për të cilat janë akuzuar sipas pikave 2 dhe 3 të aktakuzës.
“Gjykata nuk ka mundur të vërtetojë se cilat kanë qenë qoftë edhe veprimet individuale të të akuzuarve, që ia kanë shkaktuar këtë dëm buxhetit të Republikës së Kosovës, a e kanë shkaktuar këta të akuzuar këtë dëm, cili veprim veç e veç i tyre ka rezultuar me dëmin e shkaktuar dhe në çfarë vlere”.
Në këtë rast, fillimisht ishin të përfshirë 45 mjekë, por për shtatë prej tyre për arsye shëndetësore u veçua procedura. E për Sami Gjokën dhe Bedri Zaitin ka pushuar tërësisht, pasi vdiqën ndërkohë.
Gjithashtu gjatë kësaj kohe kanë vdekur edhe gjyqtarët e rastit, Shahadije Gërguri e Shashivar Hoti, si dhe avokati Nikë Shala.
Mjekët akuzoheshin se në periudhën 1 janar 2011 - 31 dhjetor 2015 i referuan në dy spitale private pacientët e QKUK-së pa pasur nevojë për trajtime shtesë, duke shpërdoruar detyrën zyrtare të mjekut dhe duke marrë nga spitalet private 500 euro ryshfet për çdo stentë të vendosur te pacientët, e nga 150 euro për secilën koronarografi të kryer.
Prokuroria Speciale pretendonte se dëmi ishte mbi 4.5 milionë euro, ndërsa vlera më vonë ishte ndryshuar në fjalën përfundimtare në 11 mijë e 430 euro.
Ndaj disa mjekëve dhe pronarëve të këtyre spitaleve private po vazhdon gjykimi në rastin e njohur si “Stenta 3”.
Kardiologu Gani Bajraktari, i liruar nga akuzat të mërkurën, kritikoi prokurorinë, duke e quajtur “sharlatane”.
“Ka qenë e ditur se do të kalojë kështu. Qe 7 vjet e kemi thënë disa herë në media.... një profesionist që për fat të keq sot udhëheq Prokurorinë e shtetit, dëshmoi se të gjithë kolegët tanë janë të pafajshëm, siç ka qenë e ditur, duke shkaktuar dëm të madh në radhë të parë te pacientët që janë frikësuar për trajtimin e tyre dhe kanë pësuar vdekje të shumta, që po të bëhet studim i mirëfilltë do të jenë me numër katastrofal”, e ka cilësuar procesin Gani Bajraktari, doktor i akuzuar në këtë rast.
E, për kolegët e tij ai ka thënë se vetëm kanë zbatuar legjislacionin dhe rregullat.
“Më shumë përgëzoj trupin gjykues, sepse sot ishte korrekt sesa kolegët e mi të cilët e dinin që nuk kanë bërë ndonjë faj. Ata vetëm kanë referuar pacientët konform udhëzimeve administrative, asgjë më shumë. Por fatkeqësia ishte sepse kjo maskaradë, kjo lojë zgjati më shumë se 7 vjet dhe besoj që është një shembull për të mos u përsëritur”, ka thënë Bajraktari.
Në këtë rast, të akuzuar ishin edhe ish-ministri i Shëndetësisë, Ferid Agani, ish-sekretari i Ministrisë së Shëndetësisë, Gani Shabani dhe 11 të tjerë. Rasti ishte ndarë në tri pjesë në shqyrtimin fillestar.
Agani e Shabani më 1 gusht 2022 u liruan nga akuza e vendimet i vërtetoi edhe Gjykata e Apelit.
Vendimi i së mërkurës është i shkallës së parë. Palët e pakënaqura kanë mundësi që rastin ta procedojnë në Gjykatën e Apelit.
© KOHA. Të gjitha të drejtat janë të rezervuara.
