Kryeministri Albin Kurti ka thënë se dialogu me Serbinë ka dalë nga binarët për shkak të anshmërisë së emisarit evropian, Miroslav Lajçak, në këtë proces.
Në një konferencë për media, Kurti, teksa ka shpalosur hollësi nga takimi i 14 shtatorit, ka thënë se në takim janë kuptuar gjëra që nuk janë ditur më parë.
Sipas tij, nga takimi i javës së shkuar është marrë vesh se pala serbe nuk ka bërë asnjë propozim për zbatim të sekuencuar të marrëveshjes bazë dhe se Lajçaku në diskutimet e bëra për këtë çështje ishte përfaqësues i Serbisë.
“Ne kemi besuar që kompromiset që i formulonte Lajçaku janë në mes dy lloj propozimeve, të Kosovës dhe Serbisë por po del që kanë qenë vetëm deformim i propozimeve tona se Serbia nuk ka dhënë propozime asnjëherë”, ka theksuar Kurti.
Sipas Kurtit, për sjelljen joneutrale e jokorrekte të emisarit Lajçak, ai duhet të jep llogari para institucioneve të Bashkimit Evropian.
Kurti ka mohuar se Bashkimi Evropian ka bërë ndonjë propozim. Ka thënë se dokumenti i prezantuar nga Brukseli zyrtar pas takimeve është plani që Kosova e ka refuzuar në fund të korrikut në takimin e kryenegociatorëve.
“Ose do e zbatojmë marrëveshjen bazike në tërësi, në plotëni ose nuk mund të zbatojmë vetëm ato që i do Serbia. Kjo logjikë ka vdekur dhe një republikë e pavarur e Kosovës, nuk mund, nuk duhet dhe nuk do të ecë në një shteg të tjerë”, ka deklaruar Kurti.
Shefi i ekzekutivit ka thënë se një ditë pas takimit u ka dërguar letër liderëve në Francë, Gjermani, Itali e SHBA.
I pyetur për masat ndëshkuese ndaj Kosovës, Kurti ka deklaruar se nuk ka asnjë arsye që ato të vazhdojnë të jenë në fuqi.
E zëvendëskryeministri Besnik Bislimi ka thënë se ka pasur premtime nga emisari Lajçak se masat ndëshkuese do të hiqen qysh para takimit të 19 korrikut, por edhe para atij të 14 shtatorit.
“Në vend të kësaj, z. Lajçak ka raportuar te vendet anëtare që masat ndaj Kosovës po kanë efekt dhe të mbeten në fuqi. I vetmi efekt që kanë prodhu është ashpërsimi i fjalorit të z. Vuqiq”, ka theksuar Bislimi.
Kryeministri Kurti e presidenti i Serbisë, Aleksandër Vuçiq, u takuan në Bruksel më 14 shtator. Takimi përfundoi pa sukses, e për këtë nga Serbia e BE-ja faji iu hodh kryeministrit të Kosovës.
© KOHA. Të gjitha të drejtat janë të rezervuara.
