Kryeministri i Kosovës, Albin Kurti, është shprehur se vizionin e tij të përgatitur për draftin e statutit të Asociacionit do ta konkretizojë kur të ketë pajtueshmëri për shtyllat e tekstit të cilin e ka paraqitur.
Në Kuvend, ai ka thënë se në kuadër të dialogut është i gatshëm të diskutojë për zbatimin e nenit shtatë të Marrëveshjes së arritur në Ohër për “vetëmenaxhimin”, sipas vizionit që e ka prezantuar në Bruksel.
“Unë këtë mund të thelloj, por thellimi i kësaj nënkupton pajtueshmëri në parim. Pra kur të pajtohemi në parim, përfshirë edhe ato shtyllat që ju i përmendët që unë i kam thënë, atëherë lirisht mund të thellojmë tekstin. Por nuk mund të shkruajmë tekste alternative ndërmjet të cilave mund të gjendet një mesatare aritmetikore pa u pajtuar një herë në parim”, ka thënë Kurti.
Kurti ka thënë se vizioni i tij i prezantuar është bazuar në modelin kroat për pakicat kombëtare.
Nga deputetët kryeministri u pyet se si do t’i detyrojë serbët e pjesës veriore që të paguajnë për shërbimet publike, pas vendimit që dy kryetarët e rinj të partisë së tij kanë marrë për faturimin e energjisë elektrike.
“Shërbimi fillimisht do t’u faturohet institucioneve, pastaj bizneseve dhe në fund amvisërive”, u përgjigj kryeministri.
Por ai sërish mori kritikua për çështjen e veriut e vendosjen e kryetarëve në objektet komunale.
“Sovraniteti i Kosovës është reduktuar në një oborr dhe në një kopsht e zyrë të një kryetari që kryeministri e quan herë me k të madhe e herë me k të vogël. Është reduktuar sovraniteti te njësitë tona, të cilat po e mbrojnë një pjesë dhe një zyrë e cila e ka shumë të diskutueshëm legjitimitetin demokratik”, ka thënë shefi i Grupit Parlamentar të AAK-së, Besnik Tahiri.
Çështja e veriut sërish përplasi deputetët e pushtetit dhe ata të opozitës.
Janë bërë dy javë prej kur serbët lokalë i kanë nisur protestat e po i vazhdojnë ato para objekteve komunale për t’i kundërshtuar kryetarët e rinj shqiptarë në ushtrimin e detyrës së tyre në objekte komunale.
© KOHA. Të gjitha të drejtat janë të rezervuara.
