Kryeministri i Shqipërisë, Edi Rama, ia ka përcjellë presidentit francez, Emanuel Macron, dhe kancelarit gjerman, Olaf Scholz, një draftstatut për Asociacionin e komunave me shumicë serbe, pa e pyetur paraprakisht Kosovën në lidhje me përmbajtjen.
Në një konferencë shtypi në Tiranë, Rama e bëri të ditur këtë lajm dhe tha se dokumenti është konfidencial.
“E kam ditur me kohë që nyja gordiane e dialogut do të ishte deri në fund Asociacioni i komunave me shumicë serbe dhe bindja ime është se asnjëra nga palët nuk e do Asociacionin dhe do të bëjë çmos që ta shtyjë atë në pafundësi, duke mbajtur të hapur krizën me lloj-lloj artificesh politike apo teknike”, ka thënë Rama. “Nga ana tjetër, besoj çdo ditë e më shumë se krijimi i Asociacionit është çelësi për të hapur përfundimisht derën e afirmimit ndërkombëtar të Republikës së Kosovës e njohjes së saj nga të gjithë, e uljes së saj në Kombet e Bashkuara dhe të gjitha forumet ndërkombëtare dhe e njohjes së ndërsjellë me Serbinë”.
Rama tregoi se përmbajtjen e dokumentit nuk ia ka prezantuar Kosovës për informim.
“Nuk është detyra ime të konsultoj në këtë rast as njërën, as tjetrën palë, për më tepër pozicioni i të qenit kryeministër i Shqipërisë e bën dhe më të vështirë këtë sepse vetvetiu jam palë, dua apo s’dua unë, kështu që drafti është neutral në këtë pikë”, ka thënë kryeministri i Shqipërisë. “Nuk është bërë as për njërin, as për tjetrin. Është bërë për Kosovën në radhë të parë”.
Ai bëri të ditur se krahas presidentit Macron dhe kancelarit Scholz, të cilët i prezantoi si dy kumbarët e propozimit franko-gjerman që është kthyer në marrëveshje Kosovë-Serbi, për draftstatutin e ka vënë në dijeni edhe presidentin e Këshillit Evropian, Charles Michel, si dhe palën amerikane.
“Është një draft i punuar nga ekspertë të nivelit më të lartë amerikanë dhe evropianë prej kohësh, gjë që është bërë pikërisht në rast se do të vinte kjo ditë, kjo ditë kur palët dhe në këtë rast për mua i pakuptueshëm është pozicioni i Kosovës dhe jo i Serbisë që e përsëris, bën atë që ka bërë dhe herë të tjera, palët nuk po merren dot vesh as se kush duhet ta shkruajë këtë tekst e jo më të merret vesh se çfarë duhet të ketë teksti”, ka thënë kryeministri Rama. “Natyrisht që ky është një dokument konfidencial, i cili pa diskutim nuk pretendon të jetë zgjidhja ideale, por ju siguroj që është një dokument i nivelit më të lartë ndërkombëtar që merr në konsideratë të gjitha arsyet për krijimin e Asociacionit dhe patjetër merr në konsideratë që Asociacioni është pjesë e organizimit të jetës në Republikën e Kosovës duke adresuar të gjithë rekomandimet apo konkluzionet e Gjykatës Kushtetuese të Kosovës”.
Para se ta prezantonte këtë informatë, kryeministri Rama foli mbi situatën e fundit të krijuar në veriun e banuar kryesisht me serbë, për të cilën tha se po merr përmasat e një tragjedie politike për Republikën e Kosovës.
“Deklaratat e aleatëve tanë strategjikë lidhur me këtë situatë janë gjithnjë e më alarmante dhe sinqerisht është e pakuptueshme arsyeja e ngurrimit të autoriteteve të Kosovës për depërshkallëzimin e një situate ku dukshëm çdo ditë, çdo orë e humbur e madhe është Kosova”, ka thënë kryeministri i Shqipërisë. “Serbia po bën atë që ka bërë edhe herë të tjera, ndërsa Kosova po bën diçka që nuk e ka bërë kurrë më parë dhe si kurrë më parë po fajësohet botërisht nga të gjithë aleatët strategjikë të kombit shqiptar”.
Kosova ka ndërmarrë aksionin për t’ua siguruar qasjen në objektet komunale kryetarëve të katër komunave të veriut, të zgjedhur nëpërmjet një procesi elektoral që e ka mbështetur faktori ndërkombëtar. Serbët që bojkotuan procesin kundërshtuan me forcë hyrjen e kryetarëve në zyrë. E ndërkombëtarët bënë përgjegjëse Kosovën për situatën, pasi theksuan se kryetarët e rinj duhet ta ushtrojnë mandatin nga zyra të tjera, meqë janë pa legjitimitet shkaku i pjesëmarrjes së ulët në zgjedhje.
Meqë Qeveria e kryeministrit Albin Kurti ka refuzuar t’i heqë forcat policore nga hapësira përreth ndërtesave komunale, protestat e serbëve kanë vazhduar e komuniteti ndërkombëtar ka paralajmëruar pasoja.
Kryeministri i Shqipërisë vazhdimisht i ka dhënë të drejtë komunitetit ndërkombëtar në kërkesat ndaj Prishtinës zyrtare dhe ka kritikuar kryeministrin Kurti për vendimin.
Kritikën e përsëriti edhe në konferencë, pasi u pyet për sulmet ndaj Kurtit.
“Unë nuk sulmoj Albin Kurtin. Albin Kurtin e fajëson bota e tërë demokratike me emër dhe me mbiemër dhe kjo mua më shkakton vetëm keqardhje, sepse nuk shoh pse duhet të ndodhë kështu”, ka thënë Rama. “Duhet tërhequr policia menjëherë, nuk ka çfarë pret policia atje, rri kot atje nëpër godina bosh, sepse Kosova është më e interesuara për këtë gjë dhe këta ndërkombëtarët janë të zotët e shtëpisë atje dhe është shumë e vështirë ta mendosh atë shtëpi pa ata edhe për një kohë të gjatë, aq më tepër pastaj t’i nxjerrësh ata nga shtëpia me shqelma”.
Kryeministri i Shqipërisë ka thënë të jetë i shqetësuar për, siç ka thënë, tkurrjen dramatike të Kosovës në sytë e aleatëve dhe për tonet ultimative të aleatëve. Sipas tij, kjo situatë mund të sjellë pasoja të pallogaritshme në shumë aspekte, duke filluar nga pasoja e rritjes së numrit të trupave në Kosovë. Nuk ka përjashtuar as mundësinë që autoriteteve të Kosovës t’u mohohet tërësisht qasja në veri.
“Ajo që mund të ndodhë është shumë e rëndë, është shumë e rëndë. Nëse trupat e huaja do të marrin veriun e Kosovës, çështja do të kthehet në tryezë, kush e di pas sa vitesh”, ka thënë Rama. “Ky është një nga ato momentet në historinë politike që minuta bën vitin, ora bën dekadën dhe dita bën shekullin”.
© KOHA. Të gjitha të drejtat janë të rezervuara.
