I pandehuri s’e pranon fajësinë për kanosjen e Fatmir Lamës
Pëlqeje KTV Video për të parë video të përzgjedhura nga KOHA
Rasim Vatovci, i akuzuar për kanosjen e autorit të dokumentarëve të KTV-së, Fatmir Lama, nuk e ka pranuar fajësinë në shqyrtimin fillestar për rastin që ndodhi në vitin 2017. Në Gjykatën Themelore në Prishtinë ai tha se nuk ndihet fajtor. E në dokumentarin “Rrëfime për Kosovën”, para gjashtë vjetësh ishte publikuar material arkivor që Lama e kishte siguruar nga Arkivi i Kosovës, ku përmendej babai i të pandehurit si person me mbështetje të organeve të sigurisë së Serbisë
Gjashtë vjet pasi i pandehuri Rasim Vatovci e kërcënoi autorin e serisë së dokumentarëve të KTV-së, “Rrëfimet për Kosovën”, Fatmir Lama, shkaku i punës së tij, është mbajtur të martën seanca e shqyrtimit fillestar për rastin. Para Gjykatës Themelore në Prishtinë, i pandehuri u deklarua i pafajshëm për veprën penale të kanosjes.
“Jo, jo... Më vjen mirë që është Fatmir Lama këtu, se e kam lutur si për gjak: mos fol fjalë të ndyta, edhe ka bërë falsifikim, e ka bërë videon”, tha Vatovci.
Deklarimin e tij Lama e kundërshtoi si të pavërtetë, tek tha se përmbajtja në dokumentar ishte nga dokumentet arkivore.
“Në dokumentarin që është shfaqur nuk ka asnjë fjalë në tekstin tim. Me këtë që e tha zotëria, që unë kam deklaruar se babai i tij ka dhunuar, nuk ka asnjë të vërtetë”, tha Lama.
E prokurori i Prokurorisë Themelore në Prishtinë, Bekim Kodraliu, tha se i pandehuri, që në telefonatën kërcënuese drejtuar Lamës i është prezantuar si i biri i një personi që në dokumentar përmendet si drejtor i Shkollës së Dubovcit, i shkaktoi atij shqetësim e ankth.
“Gjatë bisedës telefonike i pandehuri e ka kanosur të dëmtuarin, personin zyrtar për shkak të detyrës zyrtare, punës së tij si producent në televizionin e lartcekur, duke e kanosur: ‘Ruaje familjen, ruaje veten. Ose ke me ma tregu njeriun që ta ka dhënë materialin ose ke punë me mua. Krahët me i pasë se s’të lëshoj të gjallë’”, tha Kodraliu.
Avokatja e të pandehurit, Arlinda Haziri, e hodhi poshtë fajësinë e klientit dhe theksoi se do t’i kundërshtojë aktakuzën dhe provat.
“I akuzuari nuk e ka pranuar fajësinë në këtë seancë të cilën do ta kundërshtojmë, edhe aktakuzën, edhe do ta bëjmë edhe kundërshtimin e provave të cilat unë nuk i kam pranuar dhe kërkoj që të njëjtat në ditët në vazhdim të më dorëzohen nga ana e Prokurorisë”, tha avokatja Haziri.
Ndërsa gjyqtari Eroll Gashi e informoi atë se ka 30 ditë kohë për t’i bërë këto kudërshtime.
“Deri më datën 25.05.2023 keni të drejtë ta paraqisni kundërshtimin e provave mbi të cilat është ngritur aktakuza. Po ashtu keni të drejtë për kundërshtim të aktakuzës nëse konsideroni se është e ndaluar me ligj”, u shpreh Gashi.
Në episodin e shtatë të dokumentarit të Lamës janë shfaqur dokumente të Arkivit të Kosovës, në të cilat për babanë e Vatovcit pretendohej se, pavarësisht përpjekjeve për shkarkimin e tij, shkaku i sjelljeve jokorrekte ndaj stafit mësimor e marrëdhënieve amorale me nxënëset, organet e sigurisë të Serbisë nuk e lejuan zbatimin e masës.
Ky ishte rasti i dytë i drejtorëve të shkollave që në dokumentarin “Dhuna shtetërore”, për periudhën e viteve 1957-1966 ishte përmendur si shembull ilustrues për represionin shtetëror dhe për pushtetin e milicisë dhe të UDB-së në kohën e Rankoviqit.
Lidhur me kërcënimin ndaj autorit të dokumentarëve më 28 shkurt 2017 pati reaguar edhe Asociacioni i Gazetarëve të Kosovës.
Prokuroria Themelore e Prishtinës pati ngritur aktakuzën kundër Vatovcit për kanosje më 24 maj 2018.
E, Lama është duke e vazhduar punën e tij në KTV, me dokumentarin e radhës për rrëfimet e Kosovës për periudhën pas vitit 1983.
