Shkolla “Osman Rama” në Çabër është qendra e votimit më e frekuentuara nga 4 gjithsej që janë hapur për ta zgjedhur kryetarin e Zubin-Potokut.
Në këtë komunë me shumicë serbe, serbët bojkotuan procesin elektoral.
E shqiptarët patën mundësi të votojnë për dy kandidatë, Izmir Zeqirin dhe Flatron Hasanin.
Në Çabër votuesit shprehën pritje se pas zgjedhjeve, autoritetet e reja lokale do të bëjnë më shumë për ta.
“Presim një të ardhme më të mirë. Perspektivë më të madhe, si në fshat, si në shkollë, në të gjitha institucionet”, tha Sarë Sadiku-Selimi, banore në Çabër.
“Për kandidatin e preferuar e hodhëm votën dhe presim më të mirën, të stabilizohet gjendja. Ata janë të shantazhuar nga Serbia, andaj s’kanë marrë pjesë. E ne jemi të gëzuar që kemi marrë pjesë në votime dhe votojmë. Dhe votojmë e gjithmonë kemi votuar për shtetin tonë”, tha qytetari Naser Selimi.
Në fshatin Çabër, të dy kandidatët u zotuan se në rast se fitojnë do të punojnë në interes të qytetarëve dhe si sfidë e theksuan funksionalizimin e administratës komunale, e cila është braktisur nga serbët fundvitin e shkuar.
“Mendoj dhe punoj në atë drejtim fuqishëm, meqenëse një pjesë e dikastereve komunale janë duke funksionuar, siç janë regjistrimi civil, regjistrimi i veturave, Drejtoria për çështje sociale dhe kryesisht udhëhiqen prej komunitetit shqiptar, mirëpo janë në shërbim të të gjithë qytetarëve. Pjesa tjetër që është tani besoj se do ta mbulojmë në mënyrën më të mirë të mundshme ashtu si i takon ligjërisht, asgjë jashtë ligjit”, tha Izmir Zeqiri, kandidat i PDK-së për kryetar të Zubin-Potokut.
“Do të jemi në koordinim me Qeverinë dhe me ndërkombëtarët dhe besoj se do t’i ndjekim të gjitha instancat ligjore të cilat na takojnë, ta formojmë komunën me kabinetin. Do t’ia shtrijmë dorën e bashkëpunimit çdo qytetari serb, jo kriminelëve, vetëm qytetarëve serbë1 dhe besoj që do të na bashkëngjiten”, tha Flatron Hasani, kandidat i VV-së për Zubin-Potok.
Për zgjedhjet e parakohshme për kryetar të komunës, në Zubin-Potok të drejtë vote kanë pasur 6661 qytetarë.
Ndryshe nga Shkolla “Osman Rama” në Çabër, në vendvotimet alternative në kontejnerë që janë vendosur afër vendbanimeve serbe nuk ka pasur fare votues.
© KOHA. Të gjitha të drejtat janë të rezervuara.
