LAJMET E MBRËMJES

VV-ja në Lipjan e “shpërblen” kryetarin e Komunës me trofeun “Kampion i korrupsionit”

Anëtarët e Kuvendit Komunal të Lipjanit kanë debatuar mes tensionesh, në mbledhjen e së martës, në të cilën është diskutuar për arrestimin e 7 zyrtarëve komunalë. Ata janë kapur nën dyshimin se kanë keqpërdorur pozitën zyrtare dhe kanë mashtruar kur kanë pranuar punimet në stadiumin e futbollit në Magurë. Nëpërmjet një performance, asamblistë të Lëvizjes Vetëvendosje e shpallën kryetarin Imri Ahmeti “Kampion të korrupsionit”

Mes akuzash e kritikash ndërmjet pushtetit lokal dhe opozitës është zhvilluar mbledhja e Kuvendit Komunal në Lipjan, të martën.

Shkak për tensione është bërë arrestimi i 7 zyrtarëve komunalë që ndodhi ditë më parë nën dyshimin për abuzim me kontratën për stadiumin e futbollit në Magurë.

Nëpërmjet një performance asamblistë të Lëvizjes Vetëvendosje e shpallën kryetarin Imri Ahmeti “Kampion të korrupsionit”, duke ia dorëzuar edhe një “trofe”.

“Në stadiumin e Magurës janë investuar disa mjete të Komunës dhe aty nuk ka punime. Kjo më jep të kuptojmë se aty ka pasur keqpërdorime”, ka thënë Alban Salihu, shef i GP të LVV-së.

Përfaqësues komunalë thanë se në stadium ende nuk kanë përfunduar punimet dhe e cilësuan politik hetimin që çoi në arrestimin e 7 zyrtarëve.

“Nuk e di pse është thirrur kjo seancë e Kuvendit Komunal, sepse është dashur të thirrej një seancë gjyqësore, sepse në këtë mënyrë i keni marrë kompetencat e prokurorisë dhe të gjykatës”, u shpreh Albiona Tasholli, asambliste e LDK-së.

E, opozitarët nga radhët e Partisë Demokratike thanë se për rastin tash duhet të flasin autoritetet e drejtësisë.

“Ne kemi luftuar që ta kemi një shtet e shteti i ka organet e drejtësisë e ata e dinë a janë fajtorë apo jo. Ne kemi folur vetëm për fazën e parë, sepse dikush i ka familjarë, e fëmijët e tyre nuk mund të shkojnë as në shkollë prej akuzave kaq të rënda”, ka thënë Arsim Jashari, shef i GP të PDK-së.

Kryetari i Komunës së Lipjanit, Imri Ahmeti, bëri thirrje që të mos u bëhet gjyqi publik zyrtarëve pa verdiktin e gjykatës.

“Situata për të cilën dikush dëshiron t’ia adresojë kryetarit është e kotë, sepse janë flluska që shpejt bien. Ne duhet të jemi të vetëdijshëm në prezumimin e pafajësisë që duhet ta kemi gjithmonë prioritet dhe nuk mund të shpallim askënd fajtor pa verdiktin final të gjykatës”, deklaroi Ahmeti.

Të 7 zyrtarët komunalë u arrestuan nën dyshimin se kanë keqpërdorur pozitën zyrtare dhe kanë mashtruar, kur kanë pranuar punimet në stadiumin e futbollit në Magurë ende pa u kryer ato.