LAJMET E MBRËMJES

KFOR-i siguron Jarinjën, serbët përplasen me policinë matanë kufirit

Dhjetëra serbë kanë marrë pjesë në protestën e mbajtur disa metra larg nga kufiri me Kosovën. Tentimi i tyre për të kaluar kufirin u parandalua nga policia e Serbisë, e protesta e tyre u shoqërua edhe me përleshje mes pjesëmarrësve e zyrtarëve policorë. Pika kufitare të cilët individët nga territori i Serbisë e synonin, të dielën u barrikadua nga pjesëtarë të KFOR-it.

Me tensione e përplasje me policinë e Serbisë është përcjellë protesta e serbëve në kufi me Kosovën.

Në territorin e Serbisë, dhjetëra persona, disa prej të cilëve të maskuar, janë mbledhur në përkrahje të atyre që më shumë se një javë janë duke qëndruar në barrikadat e vendosura në rrugët që shpien drejt kufirit me shtetin serb.

Protesta është shoqëruar me pankarta, muzikë e thirrje nacionaliste

Tentimi i tyre për të kaluar në territorin e Kosovës ka rezultuar i pasuksesshëm.

Krahas policisë serbe, pikëkalimi kufitar në Jarinjë është barrikaduar nga ushtarët e KFOR-it në Kosovë.

Përveç shtimit të numrit të tyre, pikëkalimi nga ana e Kosovës është siguruar edhe me rrethoja me gjemba.

Shtimin e pjesëtarëve në Jarinjë, nga misioni i NATO-s në Kosovë, KFOR-i, thanë se e kanë bërë për shkak të prezencës së mundshme të grupeve kriminale mes protestuesve.

“Është gjithmonë thelbësore që të gjithë personat që marrin pjesë në protestë të shmangin dhunën dhe të shprehin mendimet e tyre në mënyrë paqësore, duke shmangur çdo veprim joproporcional, qëndrim agresiv dhe sjellje që mund të keqkuptohen dhe të perceptohen si provokim apo dhunë e panevojshme”, thuhet në njoftimin e KFOR-it.

Barrikadat e vendosura në rrugët drejt kufirit me Serbinë janë përforcuar edhe më tej.

Në mes të dy pengesave të vendosura në rrugën drejt Bërnjakut, serbët kanë vendosur tenda, e të dielën pranë tyre ishin dhjetëra sish.

Situatë e qetë ishte në rrugën drejt Jarinjës.

Barrikada e vendosur në Rudar, edhe të dielën vëzhgohej nga pjesëtarë të KFOR-it, derisa për pak çaste ajo u monitorua edhe nga pjesëtarë të EULEX-it.

Vendosja e barrikadave drejt Jarinjës e Bërnjakut është bërë të shtunën e javës së shkuar, në shenjë proteste ndaj arrestimit të ish-pjesëtarit të Policisë së Kosovës, Dejan Pantiq.

Ai dyshohet se ka marrë pjesë në sulmin ndaj policëve e zyrtarëve të komisioneve komunale zgjedhore në veri, në fillim të dhjetorit.