Ministri i Punëve të Brendshme, Xhelal Sveçla, ka thënë të mërkurën se situata në veri tani është e qetë. Ai ka thënë se prapa sulmeve me shok-bomba e armë zjarri ndaj zyrtarëve komunalë të zgjedhjeve në komunat veriore dyshohet se qëndrojnë disa nga ish-pjesëtarët serbë të Policisë së Kosovës

Prapa sulmeve me shok-bomba e armë zjarri ndaj zyrtarëve komunalë të zgjedhjeve në komunat veriore, dyshohet se qëndrojnë disa nga ish-pjesëtarët serbë të Policisë së Kosovës, ka thënë ministri i Punëve të Brendshme, Xhelal Sveçla.

Në një konferencë për media, ai deklaroi se situata në komunat veriore gjatë ditës së mërkurë ishte e qetë, e për tensionet e djeshme kur pati të shtëna e shok-bomba, tha se janë shkaktuar nga grupet terroriste të mbështetura nga shteti i Serbisë.

Sipas tij, për sulmet në Zubin Potok dhe Mitrovicë e Veriut nuk ka ende të arrestuar.

“Gjatë këtij sulmi janë përdorur shok-bomba, granata dore dhe armë zjarri. Në këtë rast Policia e Kosovës në bashkëpunim me Prokurorinë Speciale, e ka cilësuar si sulm ndaj rendit kushtetues, kryerje e veprave terroriste, zjarrëvënie dhe mbajtje nën kontroll dhe posedim të paautorizuar të armëve. Policia e Kosovës dhe Prokuroria Speciale janë duke u angazhuar në maksimum që të gjithë kriminelët e përfshirë në territorin e Kosovës, terrorist, të sillen para drejtësisë”, ka thënë Sveçla.

Për zgjedhjet në komunat veriore që janë paraparë të mbahen më 18 dhjetor, ministri Sveçla ka thënë se shteti posedon të gjitha kapacitetet e nevojshme për të garantuar mbarëvajtjen e tyre, sipas planit të Komisionit Qendror të Zgjedhjeve

“Për më shumë, normalisht që janë institucionet gjegjëse që marrin vendime. Po presim planin e KQZ-së lidhur me aktivitetet e parapara që ky proces të vejë mbarë. Në bazë të këtij plani, Policia bën vlerësime dhe rekomandime për institucionet politike vendimmarrëse, që përfundon me vendimin e presidentes”, ka shtuar ai.

Funksionalizimi i zyrave të Komisioneve Komunale Zgjedhore në pjesën veriore u pengua të martën nga disa persona të dyshuar, duke i demoluar hapësirat.

Situata në veri është përkeqësuar, prej kur serbët braktisën institucionet në shenjë kundërshtimi ndaj vendimit të Qeverisë për t’i konvertuar në RKS targat ilegale të lëshuara nga Serbia. Ndonëse një dakordim për këtë është mbërritur, serbët refuzojnë funksionalizimin e institucioneve.