Kryeministri i Kosovës, Albin Kurti, është shprehur optimist për arritjen e një marrëveshjeje me Serbinë, pasi procesi dialogues, sipas tij, ka hyrë në një fazë të re nga gushti i këtij viti.
Në kuadër të seminarit të 102-të Rose-Roth të Asamblesë Parlamentare të NATO-s, që po mbahet në Prishtinë, Kurti ka thënë se dialogu nuk duhet të shërbejë vetëm për menaxhim të krizave, por duhet të jetë për marrëveshje.
“Për dallim nga e kaluara kur njohja e pavarësisë ishte në fund të procesit dhe po e shndërronte këtë qasje në motivim për ta vonuar procesin, për zvarritje, sepse nëse i thoni Serbisë pavarësia do të vijë në fund, ju inkurajoni Serbinë që të shtyjë fundin, mirëpo tani njohja e ndërsjellë nuk është në fund, por është në qendër të marrëveshjes, jo në fund të procesit, por në qendër të marrëveshje”, ka thënë Albin Kurti.
Synimi i Kosovës, sipas shefit të ekzekutivit është anëtarësimi në NATO dhe në Bashkimin Evropian.
Në pyetjen nëse Serbia po synon ta imponojë mënyrën e vet të jetesës, Kurti ka thënë se Serbia preferon territorin e të tjerëve, por pa të tjerët në të.
Ish-ambasadori Lulzim Peci i ka kërkuar Qeverisë së Kosovës që të bëjë më shumë për qytetarët serbë në veri të vendit, në mënyrë që të shkëputen nga kontrolli, siç i quajti ai, të elementëve të presidentit serb Aleksandër Vuçiq.
“Në krahasim me pjesën jugore, jeta e komunitetit serb në veri është nën kontroll të plotë, jo vetëm të Listës Serbe por edhe të elementeve të shtetit serb dhe të strukturave të Ministrisë së Punëve të Brendshme dhe grupeve kriminale të cilat kontrollohen nga rrethi i ngushtë i presidentit Vuçiq... Po ashtu, në pjesën veriore është një sentiment i fuqishëm pro-Rusi dhe pro-Putinit”, ka thënë Peci.
Në sesionin ku u fol për implikimet e luftës në Ukrainë për Ballkanin Perëndimor, ministrja e Punëve të Jashtme dhe Diasporës, Donika Gërvalla, pohoi se Evropa nuk po kërkon nga Serbia që të zbatojë marrëveshjet e nënshkruara me Kosovën.
Mark Galeotti, drejtor në Mayak Intelligence, ka thënë se Rusia po tenton që të shtrijë ndikimin te komunitetet që mendojnë se janë të margjinalzuara.
“Nëse njëra palë në tavolinë u jep shuplakë partnerëve në Perëndim dhe rreshtohet krah një kriminel lufte, atëherë duhet të bëhet pyetja çka tash. Çka i thotë kjo Vuçiqit dhe Putinit. Çka thotë kjo në sytë e Perëndimit. A është Perëndimi aq i dobët sa nuk arrin t’i përshtatë veprimet, kur dikush rreshtohet me dikë që kërcënon paqen, madje me përdorim të armëve bërthamore. Kemi të bëjmë me një Rusi agresive. Evropa s’ka kërkuar nga Serbia t’i përmbushë detyrat që lindin nga marrëveshjet e nënshkruara”, ka thënë Gërvalla.
“Nëse flasim për Ballkanin Perëndimor ky mund të jetë një problem i madh se si do të trajtohen këto çështje, veçanërisht në kontekstin kur keni komunitete që vazhdojnë të mendojnë se janë të margjinalizuara nga rrjedhat kryesore politike në vendin e tyre dhe këto janë gjërat të cilat po i kërkon Rusia. Këto rusët i duan, sepse duan t’i shfrytëzojnë”, ka thënë Galeotti.
Punimet e Seminarit të Asamblesë Parlamentare të NATO-s kanë filluar të shtunën dhe do të vazhdojnë edhe të hënën. Gjatë këtyre tri ditëve, mbi 100 pjesëmarrës, nga vendet anëtare të NATO-s e vendet partnere do të diskutojnë për sfidat me të cilat përballet Ballkani Perëndimor në rrugëtimin e tij euroatlantik.
© KOHA. Të gjitha të drejtat janë të rezervuara.
