“Në nderim të Beethovenit” me larmi stilesh e dëshmi të potencialit artistik

Koncerti “Në nderim të Beethovenit” ishte një sfidë për studentët të cilëve, ashtu sikurse artistëve me nam, u ka munguar koncertimi para publikut. Për interpretimin e tyre në kuadër të “Chopin Piano Festit” zgjodhën vepra sfiduese e po ashtu edhe të tilla që i kanë luajtur për herë të parë duke prezantuar aftësitë e tyre profesionale e artistike

Një përjetim i bukur muzikor dhe njëkohësisht një mundësi për t’i përkrahur artistët e rinj në rrugëtimin e tyre profesional e artistik është cilësuar koncerti i së mërkurës mbrëma në kuadër të “Chopin Piano Festit”. Njëlloj si edhe koncertet e dy netëve të tjera, skena e Festivalit është rezervuar për studentët e Fakultetit të Arteve të Universitetit të Prishtinës. Secila mbrëmje ka temën e vet, e sagën e ka nisur koncerti “Në nderim të Beethovenit” që iu kushtua pianistit dhe kompozitorit gjenial, 250-vjetori i lindjes të të cilit u shënua vjet në mbarë botën, por që “Chopin Piano Fest” e shënoi këtë vit, pasi që vitin e kaluar nuk u mbajt për shkak të pandemisë.

Që në nisje të koncertit pianistja Alberta Troni, njëherësh edhe koordinatore e programit të Festivalit, ka thënë së “Chopin Piano Fest” çdoherë edhe nëpërmjet masterklasave, por edhe me mbrëmje të tilla koncertuese krijon mundësi e hapësirë për studentë. “Kjo natë shpërfaq potencialin artistik që e kanë të rinjtë”, ka thënë Troni.

Mbrëmja nisi me interpretimin e Dafina Kerleshit dhe Poema Zhavelit, studente të pianistes Valbona Petrovci, të cilat sollën “Sonatën në D për katër duar”, për të kaluar te interpretimi i Adea Malës në korno, shoqëruar nga Melos Buza në piano. Dyshja solli “Sonatën për kornë dhe piano op.17”. Pas tyre interpretuan Viola Sulejmani – që solli “Sonatën op.54, F-dur) pasuar nga Melisa Ibrahimi, e cila solli sonatën op.57, “Appassionata”.

Ibrahimi ka thënë se koncerti sa ishte sfidues, ishte edhe kënaqësi, pasi e ka ndarë skenën me miqtë e saj.

“Sonte e performova sonatën ‘Appassionata’, një ndër veprat me të njohura e që vetë Beethoveni e ka cekur që është vepra e tij më e mirë që e ka kompozuar. Po ndihem shumë mirë tash pas koncertit. Ishte një atmosferë shumë e mirë me publikun”, ka thënë ajo. E të lumtur e ka bërë edhe një fakt.

“Ka një vit që nuk kemi performuar për shkak të pandemisë dhe ky kthim në skenë ishte jashtëzakonisht i mirëseardhur për të gjithë ne, edhe sfidues njëkohësisht”, ka thënë ajo.

Koncerti vazhdoi me interpretimin e Bimi Millës, që solli sonatën Pp.111 nr.32 dhe u mbyll me treshen Rron Bakalli në violinë, Andi Duraku në piano dhe mysafiri i tyre nga Shqipëria, violonçelisti Kaludio Zoto. Ata sollën “The Ghost Trio”. Treshja, që është formuar në vitin 2018, si fitues të garës “Ars Kosova” e luajti për herë të parë këtë vepër.

“Kemi parë që kemi një frymë të përbashkët muzikore dhe, edhe pse jemi pak në distancë pasi që violonçelisti është nga Tirana, nuk e ka zbehur atë lidhjen tonë muzikale pasi që sa herë që bashkohemi muzika është ajo që na bashkon dhe është një trio e cila duket që do të vazhdojë edhe më tutje”, ka thënë Andi Duraku. Ka shtuar se vepra që e kishin përzgjedhur është mjaft e bukur, por edhe e vështirë në aspektin teknik, muzikal, si dhe për t’ia dalë që të tingëllojnë bashkërisht mirë.

Për publikun mbrëmja ishte një dëshmi e potencialit dhe talentit që kanë artistët e rinj.

Mimoza Ibrani, prorektore për çështje akademike, e cila më pas u shpërndau edhe mirënjohje studentëve, ka thënë se ata nëpërmjet interpretimit vunë në pah talentin e tyre, por edhe punën që bëjnë në kuadër të studimeve.

“Secili festival artistik përcjell një porosi, porosia e përcjellë sot nga studentët e Fakultetit të Arteve të Universitetit të Prishtinës ishte shumë domethënëse posaçërisht në kohë pandemie. Unë u ndava shumë e kënaqur me performancën e tyre, të cilën e kanë treguar edhe në gara e festivale të ndryshme ndërkombëtare”, ka thënë ajo.

Besa Luzha, drejtuese organizative e Festivalit, ka thënë se ky koncert është vetëm fillimi i netëve të tilla ku vihet në pah puna e studentëve.

“Një mbrëmje shumë e bukur, vërehen stilet e veçanta të studentëve. Veprat që kanë përzgjedhur janë mjaft sfiduese dhe jemi të kënaqur që ata vijnë kaq shumë të përgatitur. Më të vërtetë një mbrëmje shumë e këndshme edhe për studentët, por edhe për ne që i kemi dëgjuar”, ka thënë Luzha.

Mbrëmjet studentore do të përfundojnë më 29 qershor, kur do të performojë pianisti nga Italia, Gabriele Carcano. Ai është vlerësuar nga “Suddeutsche Zeitung” si një “skulptor i tingullit”. U lind në Torino dhe filloi studimet për piano kur ishte shtatëvjeçar dhe u diplomoi në moshën shtatëmbëdhjetëvjeçare në konservatorin “Giuseppe Verdi” po ashtu në Torino.

Edicioni i 11-të i “Chopin Piano Festit” do të përfundojë në ditën e fundit të qershorit, me mjeshtren e pianos Zoya Shuhatovich, që sjell “Tinguj romantikë”.