Drejtori i Qendrës Muzeore në Berat, Miklor Pasku, ka treguar se Muzeu i Ikonografisë “Onufri”, në 6-mujorin e parë të vitit është vizituar nga 40 mijë persona. Sipas tij, shumicën e vizitorëve e përbëjnë turistët e huaj, ndonëse këto ditë përballen me të nxehtin e verës. Prej vizitorëve të huaj, listën e kryesojnë polakët dhe më pas renditen francezët, italianët, ata që vijnë nga SHBA-ja dhe nga Azia
Muzeu Ikonografik “Onufri”, i cili gjendet në qendër të Kalasë së Beratit, mirëpret çdo ditë vizitorë nga e gjithë bota. Drejtori i Qendrës Muzeore në Berat, Miklor Pasku, ka treguar se Muzeu i Ikonografisë “Onufri”, në 6-mujorin e parë të vitit është vizituar nga 40 mijë persona.
Sipas tij, shumicën e vizitorëve e përbëjnë turistët e huaj, ndonëse këto ditë përballen me të nxehtin e verës. Prej vizitorëve të huaj, listën e kryesojnë polakët dhe më pas renditen francezët, italianët, ata që vijnë nga SHBA-ja dhe nga Azia.
Muzeu “Onufri” është një destinacion i përkryer për ata që duan ta njohin historinë, bukurinë dhe shpirtin e ikonave. Është hapur më 27 shkurt të vitit 1986, me nismën e shumë personaliteteve e specialistëve të kulturës, të cilët kanë bërë të mundur që për publikun të ekspozohet thesari i ikonave dhe i objekteve liturgjike që kanë qenë të arkivuara prej vitesh, pas ndalimit të ushtrimit të besimit.
Me statusin e muzeut kombëtar, “Onufri” është njëri nga muzetë më të vizituar në Shqipëri. I vendosur në ambientet e Katedrales “Fjetja e Hyjëlindëses” e shekullit të 18-të, që prej 27 shkurtit të vitit 1986, ky muze është një nga emblemat e trashëgimisë kulturore kombëtare dhe krenaria e pasurive historike e fetare të Beratit.
Muzeu Ikonografik “Onufri”, mban emrin e njërit prej kryemjeshtërve të pikturës shqiptare të shekullit XVI dhe është ndërtuar mbi rrënojat e një kishe të rindërtuar në vitin 1797 në lagjen “Kala”, e cila ka qenë katedralja e qytetit, që është monumenti më përfaqësues i arkitekturës pasbizantine në qytetin e Beratit.
Koleksioni i muzeut kombëtar “Onufri” në Berat përbëhet nga 200 objekte të përzgjedhura nga fondet e kishave dhe manastireve të rrethit të Beratit. Ai përbëhet kryesisht nga ikona dhe nga një grup objektesh liturgjike. Veprat e këtij muzeu datojnë nga më të vjetrat të shekullit XIV deri në fillim të shekullit XX. Ikonat janë realizuar nga piktorët ikonografë si: Onufri, Nikolla i biri i Onufrit, Onufër Qiprioti, David Selenica, Kostandin Shpataraku, Adam Kristo si dhe piktorët me mbiemër Çetiri (Gjergji, Joani, Nikolla, Naumi, Gjergji i riu dhe Ndini), si dhe nga shumë piktorë të tjerë anonimë.
Edhe
“Onufri” pret gati 20 mijë vizitorë në shtator
Nën dyshemenë e absidës më 12 gusht 1968 u zbuluan dy kodikët e famshëm të Beratit, “Kodiku i Purpurt i Beratit” (“Codex Purpureus Beratinus”) i shekullit VI pas Krishtit dhe “Codex Aureus Anthimi” i shekullit IX pas Krishtit. Kodikët në fjalë janë përmendore të kulturës dhe qytetërimit, si dhe enciklopedi të vërteta të mendimit të krishterë. Dy Kodikët e Beratit janë regjistruar në listën e veprave më të rëndësishme të njerëzimit, të njohur me emrin “Memoire du Monde” nën mbrojtjen e UNESCO-s.
Muzeu gjendet në ambientet e kalasë së Beratit, e cila vazhdon të jetë dëshmitare shekullore e historisë. Kalaja për të cilën besohet se është ndërtuar në shekullin e katërt para erës sonë dhe e cila gjendet në një kodër të lartë, është kurora e qytetit antik. Me portën e gjerë, 24 kulla vrojtimi, muzeu me veprat e artistit të njohur ortodoks të ikonave Onufri, mbetjet e xhamisë, kishat dhe shumë ndërtesa të ndryshme, kalaja e Beratit vazhdon të tërheqë vizitorë vendas dhe të huaj.
Kalaja me kohë ka qenë nën kontrollin e ilirëve, bizantëve, bullgarëve, serbëve si dhe osmanëve. Burimet theksojnë se brenda kufijve të kalasë kanë qenë 30 kisha por deri në ditët e sotme kanë arritur rreth 10. Gjithashtu brenda kalasë gjendet edhe Xhamia Fetih e ndërtuar në periudhën e Sulltanit Beyazit i Dytë, nga e cila sot ka mbërritur vetëm minarja.
