Homazh me duartrokitje për aktorin idealist që bashkoi shqiptarët

“Perdja” e filmit do të binte me skenën zemërthyese kur në krye të detyrës Deda mbetet i ngrirë në një shtyllë telefonike mes acarit të malësive shqiptare. Skena pasuese me fshatarët që rropaten mes borës për t’i dalë në ndihmë fillrojtësit. Posi paralele e tejlargët me filmin e vitit 1974 “Rrugë të bardha”, edhe paraditja e së martës pati diçka nga ky tragjizëm.

Jo bora e acari, por pandemia e virusit privoi mijëra qytetarë e dashamirë t’ia jepnin lamtumirën e fundit aktorit të njohur të ekranit dhe skenës shqiptare, Rikard Ljarja. Mbrëmjen e së hënës, në moshën 77-vjeçare, vdiq në shtëpinë e tij, ku sëmundja e rëndë e kishte “ngujuar” kohëve të fundit.

Duartrokitjet e fqinjëve ishin “homazhi” i vetëm kur arkivoli u nxor nga apartamenti modest në zonën e ish-ekspozitës në Tiranë. E shoqja e tij, Marjeta Ljarja, dhe dy fëmijët, Lorena e Leandri, nuk mund t’i përmbanin lotët e vajin ndërsa makina e zezë e shërbimit funeral mori rrugën drejt Shkodrës, shkruan sot Koha Ditore.

Ashtu siç kishte qenë amaneti në të gjallë të tij, ai kishte zgjedhur vendlindjen si vendprehje për eshtrat e tij. Siç shihet në raportet televizive, mes një shiu të imët që binte pareshtur, procesioni i përzishëm ndaloi në të hyrë të Varrezave të Rrmajit. E shoqja, Marjeta, falënderoi të pranishmit që iu ndodhën pranë familjes në momentet më të vështira. Varrimin me pak të pranishëm ajo e ka quajtur si “shumë të bukur”.

“Nuk jam pishman që është një përcjellje kaq e thjeshtë, por shumë shpirtërore. Ka pafund mesazhe që e kanë dalluar pjesën njerëzore të Rikardit e jo vetëm atë të ekranit. Është kaq e bukur që është kaq e thjeshtë”, ka thënë mes lotësh Marjeta Ljarja.

Famullitari i Katedrales së Shën Shtjefnit, Vlash Palaj, ka thënë se nën ndriçimin e Ditëve të Pashkëve jeta e Rikardit duhet të shihet ndryshe.

Edhe Kulturë 21 pri 2020 I jepet lamtumira e fundit Rikard Ljarjes, 'Deda' do të prehet në Shkodër

“Artisti nuk është ai që sjell të tjerët në skenë, por nëpërmjet talentit të tij sjell të bukurën, të vërtetën dhe atë që është e rëndësishme dhe e dobishme për jetën”, ka thënë dom Palaj gjatë predikimit. “Mungon fizikisht ai, por prania e tij shpirtërore nuk duhet t’i mungojë jetës suaj”.

Artikullin e plotë mund ta lexoni në gazetën Koha Ditore. Klikoni këtu për t’u regjistruar falas.