Ekspozita me fotografitë e historisë 31-vjeçare ku protagonist ishte populli i Kosovës

Fotografi që kanë fiksuar vlugun e organizimeve paralele në vitet ’90, takime të përzemërta si dhe episode të tjera historike janë bërë pjesë e ekspozitës “Rezistenca paqësore dhe shtetndërtimi 1989-1999”.

Duke përkuar me 31-vjetorin e themelimit të Lidhjes Demokratike të Kosovës, ekspozita e hapur të mërkurën në mjediset e muzeut “Shtëpia e Pavarësisë së Kosovës Dr. Ibrahim Rugova” ka përshkuar rrugëtimin e shtetësisë së Kosovës nga fillimvitet ’90 deri në njohjen ndërkombëtare nga shtetet perëndimore.

Në hapje të ekspozitës ka marrë pjesë edhe kryeministri në detyrë i Kosovës, Avdullah Hoti si dhe ministrja në detyrë e Kulturës, Vlora Dumoshi bashkë me zyrtarë të tjerë të qeverisë në ikje.

Në një prononcim për mediat, Hoti e ka cilësuar 23-dhjetorin si datë të rëndësishme për pluralizmin dhe zhvillimin politik në Kosovë.

“Është një përmbledhje e gjithë historisë 31-vjeçare duke filluar nga themelimi i LDK-së, Deklarata e Kushtetutës, organizimi paralel, vuajtjet e qytetarëve, vrasjet, eksodi, lufta çlirimtarë dhe përpjekjet me partnerët tanë”, ka thënë Hoti.

Ndërsa ka falënderuar organizatorët, ai ka shtuar se kjo ekspozitë “mundëson që për dhjetë minuta të kesh para syve krejt historinë e popullit të Kosovës”.

Ministrja në detyrë e Kulturës, Vlora Dumoshi ka thënë se detyra e institucioneve është që të ruajnë kujtesën kolektive.

“Është e rëndësishme që qytetarët të vijnë ta shohin punën e tyre sepse në këtë histori kanë qenë pjesëmarrës të gjithë qytetarët e Kosovës”, ka thënë Dumoshi.

E kuratori i ekspozitës, Shkumbin Brestovci ka treguar se ekspozita është fryt i librave të shumtë që janë shkruar për këtë periudhë historike. Sipas tij, vitet ’90 bashkë me kohën e Skënderbeut janë dy momentet më interesante të historisë shqiptare.

“Këto dy periudha nuk kanë nevojë aspak të zbukurohen për shkak se vetë faktet e tyre janë të bukura”, ka thënë Brestovci teksa ka falënderuar fotografët Enver dhe Ilaz Bylykbashi që kishin dhuruar fondin e tyre të fotografive.

Ndryshe, shtëpia njëkatëshe që ndodhet në rrugën “Enver Zymberi”, ku dikur kishte qenë selia e Lidhjes së Shkrimtarëve të Kosovës e më vonë edhe e Qendrës për Informim të Kosovës (QIK), sipas nenit 21 të Statutit të Muzeut Kombëtar të Kosovës, konsiderohet si pjesë e Ministrisë së Kulturës.