Një burrë ukrainas ka dalë në gjyq në Francë i akuzuar për organizimin e vjedhjes së një pikture prej 1.5 milionë eurosh të gjetur në një shtëpi në Kiev një vit pasi ajo u zhduk nga një muze në Nancy.

Vepra “Le Port de La Rochelle” e Paul Signac u zhduk nga “Musée de Beaux-Arts” në Nancyn e Francës verilindore në vitin 2018.

Stafi i Muzeut ishte habitur kur kishte zbuluar një kornizë më pak në mur pasi tre persona hoqën kanavacën me një prerëse kutish, e mbështollën atë dhe u larguan nga muzeu duke e fshehur nën xhaketën që kishte veshur njëri prej tyre.

Piktura, me përmasat 46 me 55 centimetra, dukej se ishte zhdukur pa gjurmë deri një vit më vonë, kur policia e Kievit bastisi shtëpinë e një të dyshuari që dyshohej se kishte lidhje me një vrasje. Teksa kontrolluan shtëpinë e tij në kryeqytetin ukrainas, i dyshuari i paidentifikuar u tha atyre se një pikturë e vlefshme ishte në një dollap dhe i këshilloi që ta trajtonin me kujdes.

Kur u mor në pyetje, ai drejtoi gishtin nga bashkëkombësi i tij, 64-vjeçari Vadym Huzhva, që atë kohë ishte në një burg austriak pasi u dënua për vjedhjen e një pikture të Renoir në Vjenë, në nëntor të vitit 2018. Huzhva u ekstradua në Francë pas lirimit të tij në qershor 2020.

Huzhva, një koleksionist arti, ka mohuar më parë çdo lidhje me vjedhjen dhe pretendon se ai është inkuadruar. Të hënën në gjykatë ai tha: “Nuk e kuptoj se si kam ndonjë lidhje me këtë. Ju nuk keni asnjë provë për pretendimet tuaja.”

Avokatja e tij, Samira Boudiba, i tha gazetës “Le Parisien” se: “Ai nuk është në filmin e mbikëqyrjes. Gjithçka që mund të shihni janë tre persona që nuk mund të identifikohen. Gjithçka që tregon video është koha e vjedhjes së pikturës, por kjo është e gjitha. Ai po fajësohet për vjedhjen e një pikture në Francë, gjë që është e çuditshme. Pa përmendur konfliktin ruso-ukrainas, ai thotë se është një komplot”.

Huzhva akuzohet edhe për vjedhje të tjera duke përfshirë zhdukjen e një vepre të Renoir nga një shtëpi ankandi francez në rajonin e Parisit në vitin 2017, vjedhjen e dy veprave të artit nga një shtëpi ankandi në Versajë dhe një pikture nga “Béziers”, në Francën jugore në vitin 2018.

“Ajo që na befasoi ishte se sa e pasofistikuar ishte vjedhja. Ishte kaq e thjeshtë”, ka thënë François Pérain, prokurori publik i Nancyt, kur piktura e Signac iu kthye qytetit dy vjet më parë. “Ata mbanin kapelë, por vepruan me fytyrat e tyre të zbuluara, hynë nga hyrja kryesore dhe u larguan nga e njëjta derë”.

E pikturuar në vitin 1915, “Le Port de La Rochelle” është pjesë e një serie të Signac të punuar në portet e La Rochelle, Marsej, Saint-Tropez dhe Roterdam. Gjyqi pritet të zgjasë dy ditë.