Kulturë

Gjurmët e Therandës antike, 7 vjet midis projekteve dhe shkatërrimit

Gati dy vjet pas konstatimit se mbetjet arkeologjike në lokalitetin arkeologjik në “Sheshin e Lidhjes” në Prizren janë “shkatërruar deri në masë të mosnjohjes”, Ministria e Kulturës ka bërë hapin e radhës për hartimin e projektit për prezantimin, interpretimin dhe promovimin e tij. Kjo është pamja e lokalitetit të premten e 20 majit të këtij viti

Shtatë vjet e gjysmë pas zbulimit të lokalitetit arkeologjik në qendër të Prizrenit, ka rifilluar projekti për prezantimin, interpretimin dhe promovimin e tij. Në proces janë përfshirë disa institucione. Këtë herë bartëse e projektit është Ministria e Kulturës, e cila paraprakisht ishte marrë vesh për bashkëpunim me UN-Habitat Kosovën. Një propozim fillestar është zhvilluar nga grupi punues, në të cilin janë të angazhuar punonjës nga Instituti Arkeologjik i Kosovës, Qendra Rajonale për Trashëgimi Kulturore në Prizren, Departamenti për Trashëgimi Kulturore i MKRS-së dhe Komuna e Prizrenit, i cili do të prezantohet edhe para publikut në javët e ardhshme.

 

Në qendër të Prizrenit, më 2014, do të dilnin në pah ato që arkeologët i cilësuan si gjurmë të objektit romak të vilës “rustica-e apo urbana-e”, pjesë të një kompleksi më të madh, të ndërtuara në shekullin III-IV. U cilësua si lokalitet arkeologjik i periudhës klasike romake, dëshmi e Therandën antike. Mbijetuan gati dy mijë vjet, por nisën të shkatërrohen kur u nxorën në pah e u harruan prej institucioneve. U mbuluan, rizbuluan, u mbajtën debate e tryeza, u shpalosën ide e u shkëmbyen akuza midis autoriteteve, përderisa përditë konstatohet se lokaliteti arkeologjik në “Sheshin e Lidhjes” po shkatërrohet. Tash, kur gati është tjetërsuar, ka rifilluar projekti për prezantimin, interpretimin dhe promovimin e tij

Shtatë vjet e gjysmë pas zbulimit të lokalitetit arkeologjik në qendër të Prizrenit, ka rifilluar projekti për prezantimin, interpretimin dhe promovimin e tij. Në proces janë përfshirë disa institucione. Këtë herë bartëse e projektit është Ministria e Kulturës, e cila paraprakisht ishte marrë vesh për bashkëpunim me UN-Habitat Kosovën. Një propozim fillestar është zhvilluar nga grupi punues, në të cilin janë të angazhuar punonjës nga Instituti Arkeologjik i Kosovës, Qendra Rajonale për Trashëgimi Kulturore në Prizren, Departamenti për Trashëgimi Kulturore i MKRS-së dhe Komuna e Prizrenit, i cili do të prezantohet edhe para publikut në javët e ardhshme.

Arkeologu Shafi Gashi nga Instituti Arkeologjik i Kosovës ka bërë të ditur se grupi punues ka mbajtur disa takime, në të cilat janë diskutuar historiku i lokalitetit, aspektet ligjore dhe përmbyllja e procesit, në mënyrë që lokaliteti të konservohet dhe të prezantohet bashkë me një strukturë mbrojtëse.