3 perditesime
01:00

Ukraina, fituese e Eurovisionit 2022

Ukraina ka marrë 631 pikë për t’u shpallur fituese e edicionit të 66-të të Eurovisionit, që u mbajt në Torino të Italisë të shtunën. Performanca e Kalush Orchestra me këngën "Stefania" u vlerësua si më e mira nga juritë e 40 shteteve pjesëmarrëse evropiane së bashku me votat e publikut.

Për Ukrainën, kjo ishte hera e tretë që fitoi Eurovisionin. Të parin e kishte fituar më 2004, kurse të dytin më 2016.

Britania e Madhe u rendit e dyta me 466 pikë, Spanja e treta me 459 pikë, Suedia e katërta me 438 pikë, Serbia e pesta me 312 sosh.

Shqipëria, që u eliminua në natën e parë gjysmëfinale, 12 pikë ia dha Italisë.

Kthesën e madhe Ukraina e bëri me votat e publikut. Ukraina mori nga publiku 439 pikë, duke kaluar në shifrën totale 631 pikë. Me vota të jurisë Britania e Madhe ishte në epërsi me 283 pikë, pasuar nga Suedia (258) e Spanja (231). Ukraina ishte e katërta me 192 pikë. 

Eurovision 2022 ishte edicioni i 66-të i Eurovision Song Contest. U zhvillua në Torino të Italisë, pas fitores së vendit në garën e vitit 2021 me këngën "Zitti e buoni" nga Måneskin. Organizuar nga Unioni Evropian i Transmetuesve (EBU) dhe transmetuesi Radiotelevisione italiana (RAI), gara u mbajt në “PalaOlimpico”. Fillimisht, u mbajtën dy gjysmëfinale më 10 dhe 12 maj dhe finalja më 14 maj.

Morën pjesë 40 shtete, me Armeninë dhe Malin e Zi që u kthyen pas mungesës në edicionin e kaluar. Rusia ishte planifikuar të merrte pjesë, por u përjashtua për shkak të pushtimit të Ukrainës.

Ishte hera e tretë që Italia organizoi Eurovisionin, pasi e ka bërë këtë më parë për garat e vitit 1965 dhe 1991, të mbajtura përkatësisht në Napoli dhe Romë.

Eurovisioni i sivjetmë u përcoll nga mbi 13 mijë njerëz që ishin të pranishëm në “PalaOlimpico”, që shërben për ngjarje të shumta si koncerte, ekspozita, panaire tregtare, konferenca e të tjera.

Mbi 12 milionë u ndan nga Qeveria italiane e rajoni i Torinos për organizimin e kësaj finale.

Prezantues të gjysmëfinaleve dhe finales në PalaOlimpico këtë vit ishte treshja, krijuesi i hiteve Mika, këngëtarja Laura Pausini dhe ylli televiziv Alessandro Cattelan.

Shqipërinë në Eurovision 2022 e përfaqësoi Ronela Hajati, por nuk arriti ta kalonte fazën gjysmëfinale. 

Kush është Kalush Orchestra dhe çfarë do të thotë kënga "Stefania"? 

Kalush Orchestra është një grup rep i përbërë nga reperi Oleh Psiuk, multi-instrumentalisti Ihor Didenchuk, balerini Vlad Kurochka, lojtari i sopilkës Vitalii Duzhyk dhe vokalistët Tymofii Muzychuk dhe Oleksandr Slobodianyk.

Ata janë lejuar të largohen nga Ukraina me urdhër të veçantë, pavarësisht se janë mbi 18 vjeç dhe sipas vendimit të presidentit ukrainas Vlodymyr Zelensky, ata do duhej të qëndronin brenda vendit për të luftuar.

Kalush Orchestra kombinon muzikën tradicionale popullore ukrainase me repin modern dhe hip hopin.

Kënga “Stefania”, me të cilën konkurruan në Eurovision, iu dedikua nënës së Oleh.

Kënga është shkruar në gjuhën amtare ukrainase, derisa në fillim të tekstit këndohet: "Stefania nënë, nëna Stefania/ Fusha lulëzon dhe bëhet gri/ Më këndo një ninullë, nënë/ Dua të dëgjoj fjalën tënde amtare".

Kënga Stefania e Kalush Orchestras u zgjodh për Eurovisionin përpara luftës me Rusinë, por që atëherë ka marrë kuptim më të thellë të lidhur me luftën.

"Unë gjithmonë do ta gjej rrugën time për në shtëpi, edhe nëse të gjitha rrugët janë shkatërruar", thuhet mes rreshtave në këngën e grupit Kalush.

23:24

Nis votimi për fituesin e Eurovisionit

Pas përfundimit të performancave nga ana e shteteve finaliste, ka nisur votimi për të zgjedhur fituesin e Eurovisionit 2022.

Ukraina dhe Britania e Madhe janë favoritet kryesore për të triumfuar sivjet. 

22:18

“Ndihmoni Mariupolin, ndihmoni Azvostalin”, Ukraina me paraqitje emocionuese në finalen e Eurovisionit

Kalush Orchestra, grupi që po përfaqëson Ukrainën në Eurovision, dhuroi një paraqitje emocionuese në finalen e kësaj gare.

Këngëtari i grupit e mbylli performancën me fjalët “ndihmoni Mariupolin, ndihmoni Azvostalin”. Publiku u ngrit në këmbë për ta duartrokitur.

Ukraina është favorite kryesore për ta fituar Eurovisionin e këtij viti.

Mariupoli e Azvostali janë vendet ku po zhvillohen luftimet e ashpra kundër Rusisë.

22:02

Nis finalja e Eurovisionit

Ka nisur finalja e Festivalit Evropian të Muzikës, Eurovision 2022, i cili po mbahet në Torino të Italisë.

Në finale të Eurovisionit po marrin pjesë 20 shtete që u kualifikuan nga dy gjysmëfinalet, dhe “pesëshja e madhe”, Franca, Gjermania, Britania, Spanja e vendi pritës, Italia.

Shqipëria, që u përfaqësua nga Ronela Hajati me këngën "Sekret", u eliminua në natën e parë gjysmëfinale.

Renditja e paraqitjes së 25 vendeve

1. Republika Çeke

2. Rumania

3. Portugalia

4. Finlanda

5. Zvicra

6. Franca

7. Norvegjia

8. Armenia

9. Italia

10. Spanja

11. Holanda

12. Ukraina

13. Gjermania

14. Lituani

15. Azerbajxhani

16. Belgjika

17. Greqia

18. Islanda

19. Moldavia

20. Suedia

21. Australia

22. Mbretëria e Bashkuar

23. Polonia

24. Serbia

25. Estonia