Një faqe me vizatimin origjinal të stripit të njohur për Spidermanin është shitur me çmim rekord prej 3.36 milionë dollarësh, në Shtetet e Bashkuara të Amerikës. Në atë faqe shihet kryepersonazhi me kostum të zi, që më vonë do të shpinte në krijimin e antiheroit, Venom, në krijimtarinë artistike të Mike Zeck nga “Marvel Super Heroes Secret Wars” numër 8.
“Kjo faqe ishte një alamet zbulimi! Këtu Peter Parker u bë me kostumin e tij të ri të zi”, shkruhet në përshkrimin e shtëpisë së ankandeve “Heritage Auctions”. “Por…kostumi ka një sekret! Shumë shpejt merret vesh se ai është i gjallë dhe se ka agjendën e vet. Këtu është zanafilla e personazhit Venom”. Çmimi fillestar për vepër qe hiç më shumë se 330 mijë dollarë.
Rekordi i mëhershëm për një faqe nga brendësia e stripit amerikan qe 657 e 250 dollarë për atë që ishte imazhi i parë i Wolverine në botimin “The Incredible Hulk” të vitit 1974. Kopja e numrit të parë të stripit të vitit 1938 debutim i Supermanit, u shit për 3.18 milionë dollarë në ditën e parë të ankandit katërditor në Dallas, ka shkruar shtëpia e ankandeve në “Twitter”.
-
14 janar 2022 22:37
-
Shpërndaje në: