Kulturë

Petrit Halilaj merr çmimin që identifikon figurat qendrore të artit

Prishtinë, 7 korrik - Me arsyetimin se përvojat e jashtëzakonshme të jetës, me kujtime të ngjarjeve të rënda, ia mundësojnë artistit të trajtojë me ndjeshmëri të madhe rrëfimin e historisë e ngjarjeve, Petrit Halilaj, e ka shtuar në biografinë e tij edhe një çmim të rëndësishëm ndërkombëtar, shkruan sot Koha Ditore.

Artisti kosovar është vlerësuar nga juria e “Mario Merz”, një çmim i krijuar për të identifikuar e vlerësuar personalitete në fushën e artit vizual dhe atij muzikor. Halilaj, i cili kishte prezantuar Kosovën në pjesëmarrjen historike për herë të parë në Bienalen e Artit në Venecie - është përzgjedhur fitues i kategorisë së artit në edicionin e dytë “Mario Merz Prize” - i vetmi çmim ndërkombëtar për art dhe muzikë. Ai është përzgjedhur fitues nga juria dhe vota e publikut, nga lista e ngushtë me pesë artistë, përfshirë Francesco Arena, Gili Lavy, Shahryar Nashat e Suha Traboulsi. Në kategorinë e muzikës çmimin e ka marrë kompozitori amerikan Geoffrey Gordon.