Një ekspozitë memoriale për Holokaustin, e vlerësuar si e para e llojit të saj, është hapur në Emiratet e Bashkuara Arabe.
“Ajo na përkujton neve se karakteri i paprecedentë i Holokaustit gjithmonë do të ketë një kuptim universal”, ka thënë për CNN Kathrin Meyer, sekretare e përgjithshme në International Holocaust Remembrance Alliance. “Teksa po e shohim me pikëllim që brezi i të mbijetuarve të Holokaustit po ik, memorialët dhe muzetë bëhen edhe më të rëndësishëm që të sigurohet që kjo ngjarje e tmerrshme të mos harrohet kurrë”.
Ekspozita “We Remember” në Crossroads of Civilizations Museum, në Dubai, shpërfaq dëshmi të dorës së parë të të mbijetuarve të Holokaustit. Muajin e kaluar, ajo është hapur për publikun.
Elie Abadie, rabin në Këshillin Hebre të Emirateve, ka thënë se kjo ekspozitë e re e përhershme është tejet e rëndësishme, përderisa asgjë e ngjashme nuk është bërë ndonjëherë në këtë rajon.
“Ani pse shumica e njerëzve në Lindjen e Mesme e dinë që Holokausti ka ndodhur, ata nuk flasin apo mësojnë për të sa duhet. Tani, rajoni po hapet, dhe kjo ekspozitë i bën homazh asaj që ka ndodhur dhe dëshmon për njohjen publike të historisë”.
Ai ka thënë që Holokausti ngjau në shkallë të vogël edhe në vendet e Lindjes së Mesme gjatë viteve ’40, ku hebrenjtë arabë në Libi, Tunizi dhe Irak përndiqeshin për shkak të mësimeve që frymëzoheshin nga nazistët.
Sipas tij, ideologjitë e Hitlerit e kapërcyen Evropën, dhe ishte e rëndësishme për ata që jetojnë apo udhëtojnë në këtë rajon të jenë në dijeni të kësaj.
© KOHA. Të gjitha të drejtat janë të rezervuara.
