Kulturë

Kinematografia e Kosovës mban hapin me pavijon virtual në Cannes

Kinematografia e Kosovës mban hapin me pavijon virtual në Cannes

“Marché du Film”, tregu i Festivalit të Filmit të Cannes, ka nisur të hënën edicionin e tij të parë, plotësisht online. Për pesë ditë producentët, distributorët dhe filmbërësit do të bëjnë llogari për blerje të projekteve filmike. Organizatorët kanë thënë se ani pse takimet nuk do të jenë tete-a-tete, formati i ri online është një mënyrë inovative për të pasur qasje në një treg të tillë. Në këtë treg, që përfundon më 26 qershor, nuk do të mungojë as Qendra Kinematografike e Kosovës. Është bërë pjesë e tij për herë të nëntë, ani pse sivjet me pavijon virtual. Paraqitet me disa projekte filmike dhe fokusin kryesor e ka te promovimi i filmave që janë në prodhim e sipër. Për institucionin më të lartë të filmit në vend e rëndësishme është pjesëmarrja, ani pse pritjet janë me të vogla në krahasim me edicionet e kaluara.

“Marché du Film” është një nga ngjarjet kryesore në industrinë e kinematografisë dhe mbahet çdo vit dy javë, sa zgjat edhe Festivali i Filmit në Cannes, duke tërhequr më shumë se 12 mijë profesionistë. Ani pse këtë vit edicioni i 73-të i Festivalit është anuluar për shkak të pandemisë, organizatorët iu përveshën punës për të mbajtur online tregun e filmit si një ngjarje të rëndësishme në kalendarin e industrisë filmike.