Komuna e Prizrenit paralajmëron prerjen e lisit afër Mullirit të Tabakhanes

Komuna e Prizrenit paralajmëron prerjen e lisit afër Mullirit të Tabakhanes

Fisnik Minci 25 February 2020 12:51

Komuna e Prizrenit të martën ka paralajmëruar se ditëve në vijim do të bëhet prerja e lisit afër Mullirit të Tabakhanes, meqë nga organet përkatëse është vlerësuar se rrënjët e tij rrezikojnë strukturën e murit dhe të jazit te ky objekt i mbrojtur i trashëgimisë kulturore.

“Drejtoria e Shërbimeve Publike, nëpërmjet Sektorit të Mjedisit është duke e shqyrtuar kërkesën për prerjen e një lisi në lagjen Tabakhane, përkatësisht në Mullirin e Tabakhanes, objekt ky i cili është në listën e trashëgimisë kulturore nën mbrojtje të përkohshme dhe gjendet brenda kufijve të Qendrës Historike të Prizrenit. Kërkesës për prerjen e lisit të pranuar në Drejtorinë e Shërbimeve Publike më 15.10.2019, me arsyetimin se po shkakton dëme në jaz dhe në Mullirin e Tabakhanes, i është rekomanduar të merret pëlqimi edhe nga Qendra Rajonale për Trashëgimi Kulturore”, thuhet në njoftimin e Komunës së Prizrenit.

QRTK-ja, pas vlerësimit të gjendjes në terren, ka vërtetuar se rrënjët e lisit paraqesin rrezik për dëmtimin e strukturës së murit dhe të jazit, dhe si rrjedhojë ka rekomanduar Drejtorinë e Shërbimeve Publike që ta evitojë rrezikun.

Sipas Komunës, prerja e lisit do të bëhet gjatë ditëve në vijim dhe me kujdes të shtuar, në mënyrë që të mos dëmtohet struktura e mureve të mullirit.

© KOHA. Të gjitha të drejtat janë të rezervuara.

Komentet

Shto koment

Të ngjashme