Punonjësit e “Ulpianës” katër muaj pa paga, paralajmërojnë bllokim të Parkut Foto: Driton Paçarada / Koha

Punonjësit e “Ulpianës” katër muaj pa paga, paralajmërojnë bllokim të Parkut

Shaban Maxharraj Shaban Maxharraj 09 December 2019 09:27

Nëpërmjet një porosie elektronike Dejan Dimitrijeviq njoftohet se pagën e ka në llogarinë bankare. Dimitrijeviq nga Graçanica është punonjës i parkut arkeologjik “Ulpiana”.

Për herë të fundit porosinë elektronike për pagë e ka marrë në fillim të muajit gusht. Qysh prej asaj kohe telefoni nuk e ka lajmëruar se i është ekzekutuar paga. Kështu, ai bashkë me pesë kolegë të tjerë në fund të dhjetorit mbushin pesë muaj që nuk i kanë marrë pagat.

Bajram Vitija, Qamil Sinani, Dejan Dimitrijeviq, Boban Veliq, Ivan Ivanoviq, e Boban Tomiq të dielën nuk kanë ditur nga t’ia nisin për të treguar pakënaqësitë e tyre në raport me trajtimin që iu bëhet nga shteti. Ata nuk janë të vetmit që përballen me problemet me pagesa. Janë edhe 15 veta që kanë punuar në gërmime arkeologjike gjatë korrikut, gushtit e shtatorit, shkruan sot “Koha Ditore”.

Janë paguar vetëm për muajin korrik. Në anën tjetër, janë bërë më shumë se tre vjet që projekti për shndërrimin e një pjese të lokalitetit arkeologjik në park arkeologjik nuk ka përfunduar.

Pakënaqësia ka shkuar deri në atë masë saqë Dimitrijeviq, i cili është edhe pronar i një pjese të tokës ku gjendet Parku, ka thënë se nëse deri të enjten nuk bëhen pagesat do ta bllokojnë Parkun.

Vitin e kaluar “Ulpiana” u vizitua nga 33 mijë e 224 veta, sipas një regjistrimi që bëhet në hyrje të Parkut.

Me goxha pompozitet ishte bërë përurimi i Parkut të parë arkeologjik në Kosovë. Asokohe ishte premtuar se shpejt do të zgjidheshin shumë probleme.

Plani i menaxhimit ishte paraparë të përfundonte gjashtë muaj pas shpalljes së lokalitetit Park Arkeologjik. Ky dokument nuk është miratuar ende.

(Artikullin e plotë mund ta lexoni sot në “Koha Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.

Komentet

Shto koment

Të ngjashme