“Artistët e së nesërmes” me vepra kontrastesh në pritje të fituesit

“Artistët e së nesërmes” me vepra kontrastesh në pritje të fituesit

Alberina Haxhijaj Alberina Haxhijaj 05 December 2019 11:42

Tre finalistët e çmimit “Artistët e së nesërmes” për këtë vit kanë biseduar të mërkurën me vizitorët e ekspozitës në lidhje me veprat që kanë realizuar, e me të cilat synojnë çmimin tradicional. Në hapësirën e ish-klubit të boksit “Prishtina”, ku tash e një muaj janë ekspozuar veprat e tyre, publiku i ka rënë rreth e përqark ekspozitës, e cila është ndarë në tri pjesë. Artistët njëri pas tjetrit kanë ndarë detaje nga procesi i realizimit të veprave.

Edona Kryeziu, e cila është lindur dhe rritur në Gjermani, ka biseduar për identitetin e dyfishtë me të cilin përballen emigrantët. Ka thënë se pyetjen që shpeshherë ia ka bërë vetes është: “Kush vendos se cilit komunitet i përkasim”. Përgjigjen e saj ka thënë se e eksploron në veprën “Përkohshmëritë e çuditshme”, shkruan sot Koha Ditore.

Mbi 20 monologë i kishte mbledhur artistja me qëllim që të mësojë më shumë për eksperiencën e diasporës. Instalacioni i saj përfshin monologun e dy personave anonimë nga Kosova që kanë shkuar në Gjermani.

Në anën tjetër të murit, artisti nga Prizreni, Somer Şpat, për dallim nga Kryeziu ka përdorur imazhe. Përmes tyre i ka bërë një lloj homazhi linjës hekurudhore Prizren-Klinë në veprën e tij “Ne i ndërtojmë hekurudhat, hekurudhat na ndërtojnë neve”. Nëpërmjet videove dhe fotografive paraqet gjendjen aktuale, ku vegjetacioni ka mbuluar hekurudhën e pashfrytëzuar. Po ashtu, ka ekspozuar edhe imazhet me të cilat e përditshmja “Rilindja” kishte dokumentuar se si punëtorë vullnetarë po ndërtonin linjën hekurudhore. Janë fotografi të shkrepura midis viteve 1959 deri më 1963. Zanafilla e hulumtimit për këtë hekurudhë, siç ka thënë, kishte nisur më 2016.

E Dion Zeqiri ka biseduar për pamundësinë e shprehjes së vullnetit. Ai paraqitet me dy vepra që janë të lidhura me njëra-tjetrën.

“Impossible desire” (Dëshira e pamundur) përthekohet në një dorë të paralizuar. Dora është skanuar në gjendje reale e pastaj është printuar në formatin 3D. E “No content” (Pa përmbajtje) sjell një incizim të thellë të trurit që ka pësuar sulm e nuk është në gjendje që të kualifikojë se çfarë po ngjan me trupin.

Juria në përbërje të Charles Esche, drejtor i “Van Abbemuseum” në Holandë, Qëndresë Deda, artiste, fituese e çmimit “Artistët e së nesërmes” më 2018, Adam Kleinman nga Fondacioni Kadist Art, Sezgin Boynik, teoricien, Jelena Vesiq, kuratore e shkrimtare, janë ata që do t’i vlerësojnë veprat për këtë vit.

(Gjerësisht, sot në “Kohën Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.

Komentet

Shto koment

Të ngjashme