Nën tingujt e violës dhe instrumentit frymor fagot, u shfaq historia e operës mbresëlënëse për të rinj, “Anne & Zef”, në “Kino Armata” në kryeqytet.

Pjesa e Anës u luajt nga sopranoja shqiptare, Anjeza Marku, ndërsa në rolin e Zefit erdhi baritoni, Patrik Vjollca. Ajo çfarë ngjalli emocion gjatë mbrëmjes ishte muzika, e cila u interpretua nga orkestra e përbërë nga muzikantë shqiptarë, të drejtuar nga Huba Hölloköi.

Anne Frank vdiq në kampin e përqendrimit Bergen-Belsen, ndërsa Zefi është një djalë shqiptar, i cili ishte viktimë e një hakmarrjeje. Që të dy takohen në parajsë, ku zbulojnë se kanë shumë gjëra të përbashkëta me njëri-tjetrin, pavarësisht dallimeve kulturore. Ata i tregojnë njëri-tjetrit për jetën e tyre, gjë që i afron gjithnjë e më shumë dhe falë Anne Frankut, bota mëson shumë më tepër për jetën e përditshme gjatë luftës së dytë botërore.