Arrestohet i dyshuari për plagosjen e dy personave në Gjakovë

Është arrestuar të mërkurën i dyshuari për plagosjen e dy personave të martën në rrugën “Bardhyl Qaushi” në Gjakovë, ka njoftuar Policia e Kosovës.

Dy viktimave dje u dha ndihma e parë mjekësore në Spitalin Rajonal të Gjakovës, me një nga ta që u lirua për në shtëpi e tjetrin që u dërgua në Prishtinë për trajtim të mëtejmë. Sipas mjekut kujdestar, viktimat janë jashtë rrezikut për jetë.

I dyshuari ishte arratisur dje, por Policia ka thënë se ka arritur ta lokalizojë shpejt dhe sot e ka arrestuar dhe ka konfiskuar armën me të cilën dyshohet se ka kryer veprën.

Pas arrestimit, i dyshuari është dërguar në mbajtje për 48 orë.