Dy trupa të pajetë gjenden në një shtëpi në Prizren

Prokuroria Themelore në Prizren thotë se në trupat e të vdekurve u gjetën plagë nga një armë zjarri

22 January 2020 12:11
15:11

Prokuroria Themelore në Prizren, ka konfirmuar për vdekjen e një çifti në një shtëpi, që dyshohet për vrasje.

Themelorja thotë se sot është njoftuar policia se në rrugën “Jusuf Gërvalla” në lagjen Ortakoll në Prizren, në një shtëpi banimi janë gjetur dy persona pa shenja jete me inicialet D.H, dhe S.H, të cilët ishin bashkëshortë mes vete.

Në vendin e ngjarjes kanë dalë prokurori kujdestar së bashku me policinë dhe ekipin nga Instituti i Mjekësisë Ligjore të cilët edhe kanë konstatuar vdekjen e tyre.

“Sipas dyshimeve të para të Prokurorisë, në trupat e viktimave janë vërejtur plagë të shkaktuara nga arma e zjarrit. Gjatë shikimit në vendin e ngjarjes, është gjetur një armë e zjarrit – pistoletë, për të cilën dyshohet se mund të jetë arma me të cilën është kryer vepra penale”, thuhet në njoftim.

Me urdhër të prokurorit trupat e pa jetë të viktimave janë dërguar për obduksion në Institutin e Mjekësisë Ligjore në Prishtinë.

“Prokuroria Themelore në Prizren, është duke i ndërmarrë të gjitha veprimet hetimore për zbardhjen e plotë të rastit”, përfundon njoftimi.

14:38

Viktimat në Prizren, burrë e grua që jetonin në Suedi

Dy personat, D.H dhe S.H. që janë gjetur të vdekur sot në shtëpinë e tyre në Prizren, janë burrë e grua që kanë jetuar në Suedi, raporton KTV.

Vesel Gashi nga Policia e Kosovës ka thënë se dyshimet e para janë se bëhet fjalë për vrasje dhe se aty është gjetur një armë zjarri me të cilën dyshohet se është kryer vrasja.

Ai ka thënë se ende s’ka të dyshuar apo të arrestuar për rastin.

Ata kishin hyrë në Kosovë më 20 janar.

13:46

Policia dyshon për vrasje në shtëpinë ku u gjetën dy trupa të pajetë

Dy trupa të pajetë u gjetën në një shtëpi në Prizren.

Zëdhënësi për media i Policisë së Kosovës në Prizren, ka thënë se rasti që ndodhi dyshohet të jetë vrasje, raporton KTV.

Trupat janë duke u larguar tashmë nga vendi i ngjarjes, derisa Gashi tha se është gjetur një armë zjarri.

Image
12:11

Dy trupa të pajetë gjenden në një shtëpi në Prizren

Dy trupa të pajetë janë gjetur në shtëpinë e tyre në rrugën “Avni Kabashi” në lagjen Ortakoll të Prizrenit, të mërkurën në mëngjes.

Zëdhënësi Shaban Osmanollaj ka pohuar se mjeku kujdestar ka konstatuar vdekjen e tyre. Ai ka bërë të ditur se mjeku kujdestar ka konstatuar vdekjen e tyre, ndërsa ka shtuar se policia ka dalë në vendin e ngjarjes dhe me Prokurorinë po zhvillohen hetimet për rastin.

KTV raporton se Policia ka marrë informatën për rastin nga një dëshmitar.

© KOHA. Të gjitha të drejtat janë të rezervuara.

Komentet

Shto koment

Të ngjashme