Për 24 orë në Kosovë, 4 raste të dhunës fizike e psikike ndaj gruas Foto: Ilustrim

Për 24 orë në Kosovë, 4 raste të dhunës fizike e psikike ndaj gruas

08 August 2019 12:49

S’ka ditë që në raportin 24 orësh të Policisë së Kosovës nuk raportohet të paktën një rast i dhunës në familje, e kjo kryesisht e burrit ndaj gruas.

Për 24 orët e fundit u raportuan 4 raste që u ushtrua dhunë ndaj gruas. Tri raste kanë ndodhur në Prishtinë e tjetra në Leposaviq, transmeton Koha.net.

Brenda këtyre orëve, ndodhi madje edhe një vrasje.

Në Prizren, me 15 plumba e vrau gruan e tij. B. V., 61-vjeçar. Ai ia mori jetën bashkëshortes së tij Armenda Aliut.

Lexo edhe: I dyshuari për vrasjen e bashkëshortes me 15 plumba në Prizren mbrohet në heshtje

Një rrahje ndaj gruas ka ndodhur dje në Prishtinë.

“Viktima njofton se pas një mosmarrëveshje është sulmuar fizikisht nga i dyshuari mashkull K-Shqiptar .Viktima ka pranuar tretman mjekësor. Nuk raportohet për të arrestuar, rasti duke u hetuar nga njësitë relevante”, thuhet në raportin e PK-së.

Një tjetër rast në Prishtinë u raportua pasi burri kishte ushtruar presion ndaj gruas vazhdimisht. E tjetri rast, ku një burrë ushtroi jo vetëm dhunë psikike por edhe fizike.

“Dje është arrestuar i dyshuari mashkull K-Shqiptar pasi që i njëjti ka bërë presion të vazhdueshëm ndaj viktimës femër K-Shqiptare. Me vendim të prokurorit i dyshuari pas intervistimit lirohet, rasti në procedurë të rregullt. Gjithashtu, është arrestuar i dyshuari mashkull K/Shqiptar pasi që dyshohet se i njëjti ka ushtruar dhunë fizike dhe psikike ndaj viktimës femër K/Shqiptare. Viktima ka refuzuar ndihmën mjekësore, ndërsa është informuar mbrojtësi i viktimave dhe QPS-ja. Me vendim të prokurorit, i dyshuari pas intervistimit është dërguar në mbajtje. Rasti është duke u hetuar”, thuhet në raportin e policisë.

E rasti tjetër ka ndodhur në Leposaviq. Gruaja e ka raportuar në polici burrin që po e malltretonte psiqikisht.

“Ankuesja femër K-Serbe ka njoftuar se është maltretuar psiqikisht nga i dyshuari mashkull K-Serb. Viktima është intervistuar në prezencë të punëtorit social. Me vendim të prokurorit, rasti shkon në procedurë të rregullt”, thuhet në raport.

Kujtojmë se dhuna ndaj gruas në Kosovë po shënon rritje. Përveç dhunës fizike e psikike që ushtrohet çdo ditë ndaj tyre, vetëm në këta 8 muajt e 2019-s, vrasje e djeshme në Prizren është vrasja e katërt e grave në Kosovë.

© KOHA. Të gjitha të drejtat janë të rezervuara.

Komentet

Shto koment

Të ngjashme