Kryeprokurori i Prokurorisë Themelore në Prishtinë, Imer Beka, ka thënë se, sipas informatave të deritashme, është kuptuar se personi që kreu vrasjen e trefishtë në Prishtinë ka qenë me probleme mendore.

Beka ka bërë të ditur se fillimisht vrasësi kishte qëlluar për vdekje bashkëshorten e tij, më pas renë e në fund kishte vrarë veten.

“Motivet nuk dihen, por kemi marrë informacion se personi që ka bë këtë vepër ka qenë me probleme mendore. Sipas djalit të tij, ka qenë shpeshherë i kontrolluar në psikiatri”, ka thënë ai në një deklaratë në vendin e ngjarjes në lagjen “Dardania”.

Beka ka bërë të ditur se fëmija që ka qenë në vendin e ngjarjes është marrë nga babai dhe është dërguar te familjarët e tjerë.

Ai ka thënë se është herët të flitet për motivet.

Trupat e tre të vrarëve në Dardani në Institutin e Mjekësisë Ligjore

Trupat e tre të vrarëve në lagjen Dardania të Prishtinës, janë larguar nga apartamenti ku ishin për t’u dërguar në Institutin e Mjekësisë Ligjore në Prishtinë.

Sot, një burrë 61 vjeçar ka vrarë gruan e tij 60 vjeçare, nusen e djalit 28 vjeçare dhe më pas edhe veten.

Në momentin e vrasjes në dhomë ishte edhe një fëmijë dy vjeçar.

Sipas Policisë rasti po mbetet për t’u hetuar se cilat ishin motivet e kësaj vrasjeje të trefishtë.

Policia jep detaje për vrasjen e tre personave në Prishtinë

Policia e Kosovës ka konfirmuar vrasjen e tre personave në lagjen ‘Dardania’ në Prishtinë.

Zëdhënësi i policisë së Kosovës, Baki Kelani, në një prononcim për medie ka deklaruar se ende nuk dihen motivet e vrasjes, raporton KTV.

Policia thotë se 61-vjeçari ka vrarë të renë, 28-vjeçare dhe gruan e tij 60-vjeçare.

Tre persona të vrarë në Prishtinë

Policia e Kosovës ka njoftuar se të hënën rreth orës 13:20, policia kanë marrë informacion për vrasje të trefishtë në rrugën “Bill Klinton" në Prishtinë.

Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, raporton KTV.

Sipas zëdhënëses së policisë, Flora Ahmeti, nga informacionet e para dyshohet se nga arma e zjarrit janë vrarë tre persona. Vdekjen e viktimave e ka konstatuar ekipi mjekësor në vendngjarje.

Aktualisht njësitet policore janë duke punuar në sqarimin e të gjitha rrethanave që kanë të bëjnë me rastin.

Sipas informacioneve të para supozohet se një person vrau të renë, gruan e tij, pastaj edhe veten.