Arrestohen pesë persona pasi u kapën me 220 kg marihuanë, planifikonin ta transportonin jashtë Kosovës Foto: Ilustrim

Arrestohen pesë persona pasi u kapën me 220 kg marihuanë, planifikonin ta transportonin jashtë Kosovës

10 shkurt 2019 09:29

Prokuroria Themelore në Ferizaj, Departamenti për Krime të Rënda, ka njoftuar se janë arrestuar pesë persona për narkotikë.

“Pas një hetimi disa mujor në bashkëpunim me Njësitin Antidrogë, janë kryer kontrolla në dy lokacione me ndihmën e Policisë Speciale të Kosovës, si dhe, pas kontrollit në këto dy lokacione, mbrëmë janë konfiskuar 220 kg substancë narkotike të llojit marihuanë që dyshohet se ka ardhur nga shteti i Shqipërisë dhe gjithashtu janë konfiskuar tri vetura”, thuhet në komunikatë.

Po ashtu, Prokuroria Themelore në Ferizaj thotë se janë arrestuar pesë persona për shkak se ekziston dyshimi i bazuar se të njëjtit duke vepruar si anëtarë të grupit të organizuar mirë, kishin për të kryer vepër penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, nga neni 273, paragrafi 2 lidhur me nenin 281, të Kodit Penal të Republikës së Kosovës.

“Personat e arrestuar dyshohet se këtë sasi të marihuanës kanë pasur për qëllim ta transportojnë jashtë shtetit të Kosovës. Prokuroria e Ferizajt, njofton se ende janë duke vazhduar hetimet për pjesën e grupit të cilët ende janë në arrati. Prokuroria Themelore në Ferizaj, njofton se me urdhër të Prokurorit të Shtetit, pesë të arrestuarve u është caktuar masa e ndalimit për 48 orë”, thuhet në fund të njoftimit.

© KOHA. Të gjitha të drejtat janë të rezervuara.

Komentet

Shto koment

Të ngjashme