22:46

Policia në Istog arreston edhe dy persona në lidhje me grabitjen në bankë, vëllanë dhe kushëririn e Kamer Metajt

Policia e Kosovës, në orët e mbrëmjes të së enjtes, ka bërë me dije se si rezultat i vazhdimit të hetimeve intensive, ka arritur t’i arrestojë edhe dy persona të dyshuar, të cilët dyshohet të kenë qenë të përfshirë në rastin e tentim grabitjes.

“Njëri nga personat e dyshuar tanimë të arrestuar (Y. M. ) është vëllai i të dyshuarit kryesor i vrarë në vendin e ngjarjes, ndërsa personi i dytë i arrestuar (U. M.) është i afërm i tyre”, thuhet në njoftimin e Policisë.

Sipas njoftimit të Policisë, njësitet relevante policore me urdhëresë të Prokurorisë kompetente kanë kryer bastisje në dy lokacione, me ç’rast kanë konfiskuar një veturë e cila dyshohet të jetë e përdorur në rast si dhe disa pajisje elektronike-telefona, të cilat do të shërbejnë si dëshmi.

“Me vendim të Prokurorit kompetent, personave të arrestuar iu është caktuar masa e ndalimit prej 48-orëve. Policia e Kosovës, mbetet e përkushtuar në vazhdimin e hetimeve intensive lidhur me rastin”, thuhet në fund të njoftimit.

19:19

Grabitësi në Istog posedonte revole, AK-47 dhe granatë

Policia e Kosovës, rajoni i Pejës, ka dërguar komunikatë në lidhje me vrasje e dyfishtë që ndodhi sot në Istog.

Aty, mbetën të vrarë një polic dhe plaçkitësi i bankës.

Lexoni të plotë komunikatën e Policisë nga rajoni i Pejës:

Sot me 27.12.2018 rreth orës 15:35, në filialin e bankës së NLB-së në Istog, ka ndodhur një rast tentim grabitje e armatosur.

Njësitet policore kanë ndërmarrë veprimet e menjëhershme policore për t’iu përgjigjur vendit të ngjarjes, ku me të arritur në atë lokacion kanë hasur në personin e dyshuar i cili posedonte një armë zjarri të gjatë, si dhe dyshohej që kishte marrë pengë dy persona.

Personi i dyshuar në përpjekje për t’u larguar nga vendi i ngjarjes ka shtënë me armë zjarri drejt zyrtarëve policor, të cilët në vetë mbrojtje të tyre dhe të qytetarëve janë detyruar t’i përgjigjen me armë zjarri, duke e neutralizuar dhe duke e lënë të plagosur personin e dyshuar.

Gjatë intervenimit policor, si pasojë e shkëmbimit të armëve të zjarrit një zyrtar policor është plagosur rëndë, dhe i njëjti është dërguar për trajtim mjekësor në spitalin rajonal të Pejës.

Të gjitha njësitet policore nga niveli lokal, rajonal dhe ai qendror, kanë dalë në vendin e ngjarjes për të ndërmarrë të gjitha veprimet e nevojshme policore, fillimisht duke bërë sigurimin e vendit të ngjarjes, sigurimin e personelit dhe qytetarëve, me qëllim të ekzaminimit të vendit të ngjarjes, si dhe hetimit rreth përfshirjes së mundshme edhe të ndonjë personi tjetër të dyshuar .

Gjatë ekzaminimit të vendit të ngjarjes, në afërsi është gjetur një granatë dore, një armë zjarri revole dhe një armë AK-47 me municion, të cilat i ka poseduar i dyshuari.

Disa orë më vonë nga mjekët kompetent është konfirmuar vdekja e zyrtarit policor (I. D.) i cili ka shërbyer në stacionin policor Istog, si dhe vdekja e personit të dyshuar (K. M.) viti i lindjes 1968 nga fshati Shushicë e Ulët – Istog.

Nga hetimi i deritanishëm ka rezultuar se personi i dyshuar posedon të kaluar kriminale të kryer në disa vende të Evropës.

Policia e Kosovës mbetet e përkushtuar në realizimin e detyrave dhe përgjegjësive të saja ligjore, me qëllim të ruajtjes së rendit dhe sigurisë publike, ruajtjes së jetës dhe pronës si dhe parandalimin dhe arrestimin e kryerësve të veprave penale.

18:42

Detaje nga vrasja e dyfishtë në Istog, polici mori plagë në gjoks dhe qafë

Gjatë një tentim të grabitjes së NLB bankës në qendër të Istogut, të enjten rreth orës 15.30, pas një shkëmbim zjarri mes grabitësit dhe policisë, është vrarë pjesëtari i Stacionit të Policisë në Istog, Izet Demaj, derisa i vdekur në vendin e ngjarjes ka mbetur grabitësi, i cili ishte goditur nga plumbat e policisë që kishin intervenuar pasi kishin marr informatën për rastin.

Polici, pas plagosjes ishte dërguar në Spitalin Rajonal të Pejës, ku ka arritur pa shenja jete. Koha Ditore ka tentuar të kontaktojë drejtorin e këtij spitali, por ai nuk ka qenë i qasshëm. Nga burim brenda spitalit KD mëson se polici kishte pasur plagë në gjoks dhe qafë.

Zëdhënësi i Policisë së Kosovës për Rajonin e Pejës, Xhevat Ibraj, ka deklaruar për Kohën Ditore se menjëherë pas marrjes së informatës, policia ka intervenuar në vendin e ngjarjes.

“Kolegu i ndjerë ka qenë në grupin e policëve që kanë intervenuar dhe kryerësi i veprës ka shtënë në drejtim të policëve dhe e ka goditur policin. Vdekjen e tij e kanë konfirmuar mjekët në Spitalin Rajonal të Pejës”, ka deklaruar Ibraj.

Trupi i grabitësit të vrarë, deri në momentin e raportimit, ende gjendet në vendngjarje, derisa për identitetin e këtij krimineli, policia nuk dha ndonjë informatë. Gjithashtu policia nuk dha ndonjë informatë nëse grabitësi ka qenë vetëm në këtë aksion kriminel apo ka pas edhe persona tjerë.

Në vendin e ngjarjes, siç konfirmoi policia, ka mbet edhe një granatë që e kishte grabitësi me veti. Siç mëson gazeta nga burime brenda policisë, polici i vrarë, Izet Demaj, mbi 40 vjeç, ka qenë nga fshati Vrellë e Istogut dhe baba i dy fëmijëve. Ai gjithashtu ka qenë pjesëtar i UÇK-së dhe pjesëmarrës në Betejën e Koshares.


Sipas prokurores së rastit, Sahide Gashi, plaçkitësi që u bë edhe viktimë, është Kamer Metaj nga fshati Shushicë, Istog.

18:00

Plaçkitësi në Istog kishte të kaluar kriminale në Gjermani

Grabitësi në Istog ishte rikthyer nga Gjermania para tri vitesh, ku kishte vuajtur një dënim prej 17 vitesh burgim.

Prokurorja e rastit Sahide Gashi ka thënë se dorasi është nga fshati Shushicë e Istogut dhe dyshohet se ka të kaluar kriminale në Gjermani, raporton Kallxo.com.

Zëdhënësi i Prokurorisë Themelore në Pejë, Shkodran Nikçi, ka dhënë detaje për ngjarjen e cila ndodhi sot në Istog, ku mbetën të vdekur një person dhe një zyrtar i Policisë së Kosovës.

“Sipas prokurores kujdestare, e cila është në vendin e ngjarjes, dyshohet se cak i grabitjes ka qenë një bankë në qendër të Istogut. Një zyrtar policor ka hasur në njërin nga grabitësit, ku i dyshuari K.M. ka shtënë me armë në drejtim të zyrtarit policor I.D., ku si pasojë e plagëve zyrtari policor ka ndërruar jetë”, ka thënë Nikçi.

17:05

Vdes edhe një polic që mori plagë nga plaçkitësi në Istog

Një zyrtar policor i Kosovës, ka vdekur pasi që është sulmuar nga një plaçkitës në Istog.

I vdekur ka mbetur edhe plaçkitësi.

Vrasjen e të dyve e ka konfirmuar zëdhënësi i Policisë së Kosovës për rajonin e Pejës, Xhevat Ibraj.

16:41

Policia vret një burrë në Istog që po tentonte të plaçkiste bankën

Një person në tentativë për të plaçkitur, ka mbetur i vdekur si pasojë e gjuajtjes me armë nga Policia e Kosovës.

Mësohet se policët kanë qenë të detyruar të shtien në drejtim të tij, për arsye të rrezikimit të jetës së tyre, pasi i dyshuari kishte armë me vete.

Policia e Rajonit të Pejës ende nuk ka dhënë detajet për rastin.