Prokuroria Themelore në Prishtinë, ka kërkuar caktimin të masës së paraburgimit në gjykatën kompetente, ndaj të pandehurit me inicialet L.G., për shkak të veprës penale “Mashtrimi”.
I pandehuri L.G., gjendet në ndalim nga data 31 tetor 2022 me urdhër të Prokurorit të Shtetit.
Sipas kërkesës, ekziston dyshimi se i pandehuri nga gushti i vitit 2020 e në vazhdimësi, me qëllim të përfitimit të dobisë pasurore, me anë të premtimit të rrejshëm se paratë e investuara në kriptovaluta do t’iu kthehen të dëmtuarve së bashku me fitimin e tyre, ka marrë shuma të ndryshme të parave nga të dëmtuarit, deri në vlerë prej 500 mijë eurosh.
“Në këtë çështje penale, Prokurori i Shtetit ka aplikuar masat e fshehta teknike të hetimit dhe vëzhgimit, me ç’ rast më 12 tetor 2022, ka ndaluar dy persona të dyshuar të përfshirë në rastin e njëjtë dhe ka kërkuar masën e paraburgimit ndaj tyre, nën të cilën masë ndodhen aktualisht”, thuhet në njoftimin e Prokurorisë.
