Kërkohet paraburgim për personin që dyshohet se dhunoi një 12-vjeçare në Kamenicë

Për dhunimin e 12-vjeçares në Kamenicë për të cilën u raportua sot, Prokuroria Themelore në Gjilan ka kërkuar paraburgim për personin që dyshohet se e dhunoi atë.

Sipas kërkesë për të cilën njofton Prokuroria Themelore në Gjilan nëpërmjet një komunikate për medie, ekziston dyshimi se M.J. gjatë muajit tetor në Komunën e Kamenicës ka keqpërdorur seksualisht 12-vjeçaren.

“Prokuroria Themelore në Gjilan, Departamenti për Krime të Rënda, ka kërkuar caktimin e masës së paraburgimit, nga Gjykata Themelore në Gjilan, kundër të pandehurit M.J., pasi dyshohet se ka kryer veprën penale ’Dhunimi’, nga neni 227, të Kodit Penal të Republikës së Kosovës. Sipas kërkesës, ekziston dyshimi i bazuar se i pandehuri M.J., gjatë muajit tetor 2021, në komunën e Kamenicës, e ka keqpërdorur seksualisht të miturën e moshës 12 vjeçare”, thuhet në komunikatën për medie.

Me urdhër të prokurorit të shtetit, i pandehuri gjendet nën masën e ndalimit 48 orësh.

Për dhunimin e të miturës ka njoftuar këtë të mërkure Policia e Kosovës nëpërmjet raportit 24 orësh. Aty u tregua edhe se është arrestuar i dyshuari që dhunoi 12-vjeçaren.

“Është arrestuar një i dyshuar mashkull nën dyshimin se i njëjti ka kryer veprën e lartcekur ndaj viktimës femër e mitur. Me urdhër të prokurorit i dyshuari është dërguar në mbajtje”, thuhet në njoftimin e policisë.

Një person në Kamenicë është arrestuar nën dyshimin se ka dhunuar një të mitur.

Lajmi është bërë i ditur përmes raportit 24 orësh të Policisë së Kosovës.

Me urdhër të prokurorit i dyshuari është dërguar në mbajtje.

© KOHA. Të gjitha të drejtat janë të rezervuara.