Arrestohet personi që po ngiste veturën nga ku ishte rrëzuar prizrenasi i dehur
10:34
Arrestohet personi që po ngiste veturën nga ku ishte rrëzuar prizrenasi i dehur
Policia e Kosovës ka dhënë detaje për rastin në Prizren ku një person ka pësuar lëndime serioze pasi ka hipur në pjesën e përparme të veturës që po e drejtonte një person tjetër.
Sektori i hetimeve në Prizren pas vëzhgimit të kamerave ka arritur që ta identifikojë dhe ta arrestojë të dyshuarin që po ngiste veturën, V.K., një 22-vjeçar.
“I dyshuari ka qenë duke drejtuar një veturë në kohën kur viktima A G .(viti i lindjes 2002) ka qenë në veturë, në pjesën e përparme, me ç’ rast i dyshuari V K ka frenuar veturën dhe viktima ka rënë nga pjesa e përparme e veturës në tokë, ku edhe ka pësuar lëndime trupore”.
Njoftohet se gjendja e A.G. është e rëndë.
“Viktima ka marrë ndihmën e parë mjekësore në emergjencën e spitalit e më pas është dërguar me autoambulancë për në QKUK në Prishtinë për shkak të gjendjes së rëndë shëndetësore”, njoftoi Policia.
Sipas dëshmitarëve, rasti kishte ndodhur kur viktima kishte dalë nga një lokal në gjendje të dehur i cili më pas është rrëzuar.
Me vendim të prokurorit të shtetit, i dyshuari ndalet në qendrën e ndalimit për 48 orë.
09:16
Rrëzohet nga pjesa e përparme e veturës në lëvizje prizrenasi i dehur, dërgohet në QKUK
Në QKUK prej Spitalit të Prizrenit është dërguar një person i lënduar rëndë.
Nën ndikimin e alkoolit ai ka hipur në pjesën e përparme të veturës derisa ishte në lëvizje, që më pas është rrëzuar.
Shoferi i veturës është dërguar në mbajtje.
“Është raportuar se viktima mashkull kosovar pas trajtimit mjekësor në spitalin e Prizrenit, është dërguar në QKUK, pasi që nën ndikim të alkoolit ka hipur në pjesë e përparme të veturës, të cilën e drejtonte i dyshuari mashkull kosovar dhe më pas është rrëzuar dhe ka pësuar lëndime të rënda trupore. Me vendim të prokurorit, i dyshuari është arrestuar dhe dërguar në mbajtje”, raportoi PK-ja.
